Ардақты мейрам аясында (ФОТОРЕПОРТАЖ)
Бүгін ҚР Конституциясы күні! Ел болып думандатып жатқан осы ұлық мерекені Қостанай жұртшылығы да өз деңгейінде атап өтті. Қала тұрғындары мен қонақтары орталыққа жиналып, "Ата Заңым – асыл Заңым!" атты концерттік бағдарламаны тамашалады. Мейрамның сәнін өңір өнерпаздары келтірді деуге болады. Әсем ән әуелеп, күй күмбірлеп, көркем би көңілдің қошын кіргізгендей. Жұртшылықтың жүзі жадыраңқы: әуенге қосылып, ырғаққа ілесе ырғалып, жанарлары нұрланып, бір-бірін мерекемен құттықтасып жүр.
Концерттік бағдарламаны "Қарбыз бен қауын" мейрамы жалғастырды. Бұл шара Қазақстандағы Өзбекстан жылы аясында ұйымдастырылған. Бақшаның аталмыш дақылдарынан жасалған қолөнер көрмесі көздің жауын алады. Бұл көрмеге Қостанайдағы 11 балабақша ұжымы қатысып отыр. Олар өзара сайысқа түсті. Төрешілерге үздігін таңдау оңайға соқпайтындай. Көркемдігі бірінен бірі асады.
"Ең бастысы жеңіс емес, қатардан қалмай, ұжым болып атсалысып жатырмыз. Біздің ерекшелігіміз – кейбірі секілді фигураларды арнайы шеберлерге жасатпай, қолымыздан келгенше өзіміз әзірледік. Бұл сайыс, негізінде, ұжымдардың ұйымшылдығын, ауызбірлігін көрсетеді деп ойлаймын" , – дейді №13 балабақшаның тәрбиешісі Әсел Қозбақова. Сонымен, сайыс қорытындысында №5 ясли-бақша ұжымы 1-орынды жеңіп алды. Қатысушылардың ешқайсысы сый-сияпатсыз қалған жоқ.
Шара көңілді ән-күймен әрленіп, қызықты ойын-сауықпен жалғасын тапты. Мәселен, қарбыз жеуден жарыс ұйымдастырылып, көрермендер мәз-мәйрам болды. Сайыс жеңімпаздары үйлеріне бір-бір қарбызбен қайтты.
Суреттерді түсірген Бердіболат Көркембаев