ССКӨБ – үздік жеткізуші

Магнитогор металлургия комбинаты 2017 жылдың қорытындысы бойынша «ССКӨБ» АҚ-ті «Темір кені шикізаты» аталымында «Үздік жеткізуші» деп танып, арнайы Құрмет дипломын табыс етті.

Кен алыбының басты серіктесі – Магнитогорлық комбинат жыл сайын «Үздік жеткізуші» байқауын өткізіп тұруды игі дәстүрге айналдырған. Мұнда үміткерлер жеткізілетін өнімнің сапасы, өнімнің сұранысқа иелігі мен тартымдылығы, оңтайлы баға, жеткізілген тауарлар мен қызметтердің инновациялық және ғылыми-техникалық құрамдасы, тұтынушыға көзделуі, келісілген мерзімдер мен жеткізілімнің көлемін сақтау сияқты критериялар бойынша бағаланады. Биыл іріктеу өте қатаң болды және жеңімпаздар 18 аталым бойынша марапатталды. Солардың қатарында рудныйлық кәсіпорын «Үздік жеткізуші» аталымын екінші жыл қатарынан жеңіп алып отыр.

Магнитогор металлургия комбинаты және Еуразиялық Топты 60 жылдық тарихы бар ұзақ мерзімді қарым-қатынастар байланыстырады. Тараптар 2016 жылы 30 млн тоннадан астам шикізатты, оның ішінде ССКӨБ өндіретін шекемтас пен концентратты жеткізу туралы келісімге келді.

– ССКӨБ ММК-ның тұрақтылығы мен сенімділігін бағалайды және іскерлік байланыстар алдағы уақытта да нығая түседі деген үмітте. Бұл біздің кәсіпорынның тұрақты дамуы үшін берік негіз бола алады. Қазақстандық кеншілер мен ресейлік металлургтердің еңбектегі достығы – бірыңғай, нәтижелі тау-кен өндіру технологиясын құруда басқаларға үлгі, – дейді «ССКӨБ» АҚ президенті Береке Мұхаметқалиев. –

Жеткізушілермен қарым-қатынас, серіктестіктің тиімділігі кәсіпорынның табысты дамуының шешуші аспектілерінің бірі саналады. Айта кетейік, 2017 жылы «ССКӨБ» АҚ ресейлік металлургия комбинатына 7,54 млн тонна темір кені өнімін жөнелтті.

Қуаныш ЕСҚАБЫЛ