Смартфонға латын қарпі енгізілді

Ұялы телефонға қазақ тілді пернетақта орнату енді қиындық тудырмайды. Қазақ тіліне негізделген латын әліпбиінде қатесіз жазуға мүмкіндік бар. Оны кез келген адам Аpp Store және Android жүйесінде қызмет ететін телефонға жүктеп ала алады. Бағдарлама Qazaq Latin Keyboard деп аталады. Бұл туралы "Астана" телеарнасының сюжетінде айтылады, – деп хабарлайды "Тенгри ньюс" тілшісі.  Кеше, 15 мамырда аталған бағдарлама мен Resmihat.kz онлайн-порталының тұсаукесері өтті. Қос бағдарлама да қазақ тілін үйреніп, латын қарпінде оңай жазуды қамтамасыз етуді мақсат еткен. Қазірдің өзінде ешбір жарнамасыз демо-нұсқасын бес мыңға жуық қолданушы жүктеп алыпты. "Рухани жаңғыру" бағдарламасы аясында әзірленген қос цифрлық жоба алдағы уақытта жалғасын табады, – дейді жасақтаушылар.

"Біз бұл клавиатураны жасаған мақсатымыз – арнайы жүктеп алсаңыз, ішінде кириллица да бар, қазақша-орысша, ағылшынша да бар, латынша бар. Жастар қолдансын деп жасадық және ішіндегі әріптерді орналастырғанда да біз саралап-сараптап адамға қалай ыңғайлы, солай етіп жасадық", – дейді Мемлекеттік тілді дамыту қорының директоры Азат Шәуеев.