Өлкетану материалдары – сандық жүйеде
«Цифрлық Қазақстан» мемлекеттік бағдарламасының аясында «Әлеуметтік саланы цифровизациялау» кіші бағдарламасы іске асырылмақ. Облыстық мәдениет басқармасының басшысы Ерлан Қалмақовтың айтуынша, биыл осы мақсатта 2 жоба қолға алынды. Оның бірі мәдени іс-шараларға онлайн билет сату жүйесін енгізу болса, екіншісі – «Қостанай облысы: тарих, адамдар, оқиғалар» толықмәтінді деректер базасы.
-Бүгінде облыстағы мәдени мекемелер, атап айтқанда қазақ және орыс драма театры, облыстық филармония Қазақстандағы ірі онлайн билет сату қызметі – «Ticketon.kz» арасында келісім-шартқа қол қойды. Сол себепті қызметкерлер аталған жүйеде жұмыс істеу үшін арнайы оқу курстарынан өтті. 2018 жылдың бірінші тоқсанында-ақ, 113 билет онлайн сатылды, – деді Ерлан Қалмақов өз баяндамасында.
![IMG_7147](https://old.kostanaytany.kz/wp-content/uploads/2018/04/img_7147.jpg)
Мәдениет басқармасы ұсынған тағы бір жаңашылдық – толықмәтінді электронды ресурстарды пайдалану. Л.Толстой атындағы облыстық әмбебап ғылыми кітапхана базасында «Қостанай облысы: тарих, адамдар, оқиғалар» жобасы жүзеге асырылады.
– Толықмәтінді мәліметтер базасы пайдалану арқылы мерзімді басылымдар, кітаптардың электронды нұсқасына қол жеткізуге болады. Бұған қоса өлкетану материалдары сандық жүйеге көшіріледі. Мәліметтер PDF форматында қолжетімді. Бүгінге дейін 3000-дай құжат көшіріліп алынды. Кітапханашылар өлкетану құжаттарын, газет архивтерін республикалық автоматтандырылған кітапханалық-ақпараттық жүйеге («РАБИС») енгізеді. Мұнан соң кез келген адам өздеріне қажетті ақпараттарды қарап, жүктей алады, – деді Ерлан Болатұлы.
![IMG_7199](https://old.kostanaytany.kz/wp-content/uploads/2018/04/img_7199.jpg)
Басқарма басшысы айтқандай, заманауи қазақ мәдениетін таныстыру бойынша бірнеже жоба жоспарға енді. Осы саладағы жұмыс биыл жалғасын табады.
Қасқырбай ҚОЙШЫМАНОВ,
Суретті түсірген Бердіболат Көркембаев.