Кәсіподақтар жастарды қолдайды
ҚР кәсіподақтар федерациясының жаңадан тағайындалған төрағасы Бақытжан Әбдірайым бастаған бір топ делегация Қостанайдағы «СарыарқаАвтоПром» ЖШС-інде болып, отандық автоөндірістің жай-күйімен танысты. Зауыт басшылығы мәртебелі меймандарға кәсіпорынның тыныс-тіршілігі туралы кең мағлұмат берді.
Кәсіпорын директоры Сырым Семейбаевтың айтуынша, «СарарқаАвтоПром» серіктестігі – JAC, Peugeot, Ssang Yong, IVECO, ANKAI, Hyundai, Ravon тәрізді бүкіләлемдік брендке айналған көліктерді құрастырады. Бүгінде Қостанайда шығарылған жеңіл көліктерге сұраныс жоғары. Сондықтан, еліміздің барлық өңірінде алпауыт кәсіпорынның дилерлік орталықтары жұмыс істейді.
Өндіріс ошағында ешқандай маман тапшылығы жоқ. Мұнда жұмыс істейтіндердің дені жастар. Зауыт басшылығы кадрлар мәселесін қайта даярлау, дуалдық оқыту жүйесі арқылы шешіп отыр. Мәселен, 2015-2017 жылдар аралығында кәсіпорын тарапынан 3 225 адам оқып алған. Кәсіби мамандарды даярлауға 28,5 млн теңге бөлініпті. Сондай-ақ, 250-дей жас маман Италия, Германия, Корея тәрізді машина өндірісі қарқынды дамыған елдерде оқып, тәжірбие алмасып келіпті. Бұл мақсатқа да 27,5 млн теңге жұмсалған. Жалпы, кәсіпорын мамандар даярлау ісіне бей-жай қарамайды. Өйткені, отандық көлік өндірісінің болашағы зор. Жылма-жыл әлеуеті артып келе жатқан кәсіпорынға білікті, кәсіби мамандар қажет екендігі белгілі. Сондықтан, зауыт басшылығы шетелдер мен еліміздегі жоғарғы, орта кәсіби білім беретін оқу орындарымен елу шақты келісім-шарт жасасқан.
-Кәсіподақ ұйымдары қарапайым жұмысшылардың барлық құқығын қорғайды. Олардың әлеуметтік жағдайын жақсартуға септігін тигізбек. Әсіресе, жас мамандарға ерекше қамқорлық танытуды көздейді. Өйткені, жастар – қашанда жаңашылық істердің жаршысы.Оның үстіне қазір жаңа технологиялар заманы. Мұның бәрін осы жастар игереді. Бүгін зауытта жұмыс істейтін алты баланың анасымен таныстық. Өзі жап-жас. Жақында облыс әкімінің қолынан «Күміс алқа» медалін алыпты. Біз федерация тарапынан оған 300 мың теңге сыйақы бердік.Осындай жастарды үнемі қолдап отыру біздің ортақ парызымыз,-деді ҚР кәсіподақтар федерациясының төрағасы Бақытжан Әбдірайым.
«СарыарқаАвтоПром» ЖШС-інде 800-ден астам адам жұмыс істесе, соның сексені зауыт кәсіподақтар ұйымына мүше. Оны 24 жастағы дәнекерлеуші Дмитрий Парфенов басқарады. Кәсіподақ ұйымы серіктестік басшылығымен екі жақты ұжымдық келісім-шартқа қол қойды. Осы арқылы өндіріс ошағы кәсіподақ ұйымының қатарын молайтуды көздеп отыр.
Әлібек ЫБЫРАЙ
Суреттерді түсірген Бердіболат КӨРКЕМБАЕВ.
