Той-думан ұлттық ойындармен жалғасты

Облыс орталығындағы Наурыз тойы іргелес жатқан Заречный ауылындағы «Арғымақ» ипподромындағы ұлттық спорт ойындарымен жалғасты. Алдымен, облыс орталығының тұрғындары мен қонақтарын аймақ басшысы Архимед Мұхамбетов құттықтады.

 

Мұнда жиылған жұрт қыз қуу мен аударыспақ ойынын да тамашалады. Білектілер үшін қойды мойынға салып көтеруден жарыс ұйымдастырылды. 80 келіге дейінгі қатысушылар арасынан Виктор Цирик озды. Ол қойды 2 минутта 52 рет көтерді. Ал ауыр салмақта сынға түскендердің сыйлығын Анатолий Мулин олжалады. Анатолий қойды 71 рет иығынан асырды. 

 

Ал бәйгеге республиканың түкпір-түкпірінен және Ресейден шабандоздар жиналыпты. Әуелі, 3 шақырымдық тоқ бәйгенің жеңімпаздары анықталды. Бір қызығы, жүлделі үш орынды Жітіқара ауданының құнандары өзара бөлісті. Бас бәйге Ернұр Құтеген есімді шабандоздың еншісінде кетті.

 

Мұнан соң танауын көкке шаншытып, кекілін жел тараған 26 күлік аламанға түсті. Мәреге екі айналым қалғанда шын сәйгүліктер алға суырылып шығып, қалғандарынан аралары алшақтай бастады. Жұрт көмбеге беттеген жүйріктерді қиқулап қарсы алып жатты. Сонымен, Ресейден әкелінген «Юмор» атты арғымақ бас жүлдені еншіледі. Оның иесі – Рамиль Салахов. Жітіқаралық Хансұлтан Жандәулет мінген «Торғын» тұлпары мәре сызығын екінші болып кесті. Үздік үштікте – «Зарбина». Бұл сәйгүлік Таран ауданынан қатыстырылды.

 

Суреттерді түсірген Бердіболат КӨРКЕМБАЕВ.