Рудныйда 500 орындық жатақхана салынбақ

Бұл туралы Қостанай облысы әкімі Архимед Мұхамбетовтың Рудный қаласына жұмыс  сапары кезінде белгілі болды. Рудный индустриялық институтына атбасын тіреген аймақ басшысы оқу орнының материалдық-техникалық базасымен танысып болған соң проблемалық сұрақтарға көңіл болды. Институт ректоры Әбдірахман Найзабеков 1982 жылы құрылысы басталып, қаржының тапшылығынан аяқталмай қалған 4 қабатты оқу-зертханалық корпусты салып бітіру үшін 930 миллион теңге қаражат қажет екендігін алға тартты.– Қазіргі оқу корпусы бұрын жатақхана болған. Ал жатақханаға мұқтаж студенттер қатары біртіндеп артып келеді. Сондықтан оқу корпусын көшіріп, оны қайтадан студенттердің игілігіне беру керек, – деді Әбдірахман Батырбекұлы.

Осы орайда облыс әкімі проблеманы шешудің басқа жолын ұсынды.

– Қазір ел Президентінің 5 әлеуметтік бастамасы бойынша нақты тапсырма берілді. Ол бойынша қаржы ескі ғимаратты жөндеуге берілмейді. Сондықтан құрылысы бітпеген ғимаратқа қаражат бөліп, оған жатақхананы көшіру керек. Біз жақсы бір кәсіпкермен келісіп, жатақхананы саламыз. Кейін Білім және ғылым министрлігі әр студенттің жан басына қаржы бөледі. Осылайша кәсіпкер жұмсаған ақшасын біртіндеп қайтарады. Жатақхананы 500 орынға шақтасақ, 1,5 миллиард теңгеге дейін қаражат алуға болады. Осыны қала әкімі Бақытжан Ғаязовқа бақылауға алуын тапсырамын, – деді Архимед Мұхамбетов.

 

Қуаныш ЕСҚАБЫЛ