Мал басын көбейтуді мықтап қолға алды
Сарыкөл ауданы Маяк ауылдық округінің тұрғыны Элмира Есенова болашақта мал басын көбейтіп, өз кәсібін кеңейте түспек. Қарқынды іске қазірден кіріскен ол ағашқы қадамын сәтті бастады.
Мал басын көбейтуді мықтап қолға алған кәсіпкер «Жұмыспен қамту-2020» мемлекеттік бағдарламасы бойынша 1 млн. теңге көлемінде несиеге қол жеткізді. Оған 1 жылқы мен 5 бұзау сатып алды. Жылқыны табынға жіберіп, ал жас төлдерді үйдің маңында салынған жазғы алаңда уақытша ұстап отыр. Алдағы уақытта аула сыртына сарай салып, малдарға жем-шөп дайындамақ. Жолдасы Марат екеуі мал шаруашылығына мейлінше көңіл бөлген. Балаларының үлкені Мұрат та қолы бос кезінде жәрдемдесіп, ұсақ-түйек шаруаларды өзі-ақ реттейді. Нәзік жанды кәсіпкер 4 жылға алған несиені 2 жылдың ішінде қайтарып, тағы да шағын несиенің шарапатын көріп, мал басын еселендірмек ниетте.
-Осының бәрі мемлекет тарапынан көрсетіліп жатқан қамқорлықтың арқасы. Кәсіпкерлікті дамыту үшін арнайы жүзеге асырылып жатқан «Жұмыспен қамту-2020» сынды бағдарламалардың болғаны біздерге өте қолайлы әрі кәсіппен шұғылданам деушілерге мол мүмкіндік. Өзім секілді ауылдың қарапайым тұрғындарына айтарым, тамаша бағдарламадан бас тартпай, нартәуекел етіп, өз кәсіптерін кеңейте берсін. Ауылдың әр азаматы еңбек ете отырып ,елдің экономикасына өз үлесін қосса, одан артық не керек? – дейді Элмирадай кәсіпкер.
Мінеки, мемлекеттік бағдарламамен бағын сынып, кәсібін кеңейтемін деп талпынған Элмира Есеновадай еңбекқор жандар көп бола берсін дейміз!
Руслан Әлкеев
Сарыкөл ауданы
