Әлеуметтік жобалар жәрмеңкесі басталды
Қостанай облысында әлеуметтік жобалар мен идеялардың жәрмеңкесі өтіп жатыр. Тоғызыншы рет ұйымдастырылып отырған іс-шараға Қостанай өңірінің аудандары мен ауылдарынан және Астана, Алматы, Маңғыстау, Солтүстік Қазақстан облыстарынан делегаттар келді. 
Жәрмеңкеде әлеуметтік жобалар мен идеялар байқауының жеңімпаздары анықталмақ. Аталмыш байқауға 103 өтінім келіп түскен. Соның сегізі финалға өтті. Арнайы құрылған комиссия үздік төрт жобаны таңдап алады.
Жәрмеңкенің ашылу салтанатына қатысқан облыстық ішкі саясат басқармасының басшысы Бибігүл Аққожина делегаттарды облыс әкімінің атынан құттықтады.
-Бұл тоғызыншы мәрте ұйымдастырылып отырған жәрмеңке. Іс-шара мемлекет пен үкіметтік емес ұйымдардың арасындағы әріптестікті нығайтуға бағытталып отыр. Жәрмеңкеге орай республикамыздың әр аймағынан делегаттар келді. Аймақтардан келген ҮЕҰ-дың арасындағы әріптестік қарым-қатынас арта беруіне тілектеспін,-деді Б.Аққожина.
Байқауға ұсынылған жобалар мен көршілес облыстардағы үкіметтік емес ұйымдардың тәжірибесі туралы газетіміздің алдағы санынан оқисыздар.
Қымбат Досжанова
Суретті түсірген Бағдат Ахметбеков
