Ауыз су құбыры тартылуда

 Аманкелді ауданының Байғабыл ауылында бұрынғы  су құбырларының әбден тозығы жеткен. Соның салдарынан  жергілікті тұрғындар қыстың көзі қырауда ауыл іргесіндегі  өзеннен суды тасып ішеді. Ал қолдағы азын-аулақ малын да  осы өзеннен суат ойып суарады. Енді биыл жағдай оңға басқалы тұр.

«Ақ бұлақ» бағдарламасы бойынша ауылға жаңа су құбырлары тартылуда. Биылғы мамыр айында Шұрық ойпатынан басталған ұзындығы 12 шақырым 460 метрлік  құрылысқа  республикалық және облыстық бюджеттен барлығы 175 миллион 600 мың теңге қаражат бөлініпті. Осы қаржыға  «GSM Capital Grup» ЖШС мен «Строитель-2003»ЖШС жұмыс жүргізуде. Оған дені жергілікті тұрғындар тартылған. Егер жұмыс сапалы аяқталса , қазан айында  су құбырлары іске қосылып, тұрғындар игілігін көрмек.

  –  Бұл ауылдастарым үшін үлкен қуаныш болатыны анық .Қазан айында әрбір тұрғын өз үйінен су ішетін болады.  Ауылдастардың негізгі шаруасы – мал мен  бау-бақша . Енді жеке шаруашылығын дөңгелетем дейтіндер көбейе түсер  деген үміт бар -дейді  округ әкімі Данияр Тоқтаров.