Су басқан ауылдарды аралады (ФОТОРЕПОРТАЖ)
Биылғы су тасқыны Тобыл-Торғай өңірін айналып өтпеді. Қыс аяғында әзірленіп, қарғын суға қарсы тұруға қанша бекінгенмен, табиғат өз дегенінен жаңылмады. Қостанай облысында бірнеше ауылдарды су басып, бөгеттер бұзылып, тұрғындар зардап шекті. Бүгіндері бұл аудандарда тасқынның салдарын жою, баспаналарды қалыпқа келтіру жұмыстары қолға алынды.
Мәселен, Қарасу ауданындағы Жамбыл, Зеленов ауылдарын түгелдей су басып, тұрғындары әбден әбігерге түскен. Қызылсудың құрсауында қалып, дүние-мүлкі бүлінген ауыл тұрғындарымен облыс әкімі Архимед Мұхамбетов кездесті.
Тасқын кезінде баспаналарынан үдере көшкен ауылдықтар бүгіндері қоныстарына қайта жайғасып жатыр. Өңір басшысының айтуынша, тұруға жарамды деген үйлерге күрделі жөндеу жұмыстары жасалмақ, ал кейбір отбасыларға жаңа баспана салып беруді жоспарлап отыр екен.
-Сіздермен ертерек кездескім келген, алайда тасқын барлық жолдарды бөгеп тастады. Бүгін су деңгейі төмендеп, қауіптің беті қайтты. Қазір екі комиссия құрылды. Олар шығынның құнын есептейді. Барлығыңызға көмек береміз, мал-мүліктің есесін қайтарамыз. Ешкім назардан тыс қалмайды,-деді Архимед Бегежанұлы.
Ауыл тұрғындары орайы түскен сәтте тек тасқын мәселесін ғана емес, ауыл арасындағы жол мен ауыз суды алға тартты. Аймақ басшысы бұл сауалдарға да жауап берді.
-Жол проблемасы көтпеген ауылдарда бар. Оның үстіне биылғы көктем ол жағдайды одан сайын қиындата түсті. Біз бұл мәселені шешеміз, алайда әуелі халықаралық, республикалық, облыстық маңызы бар тас жолдардан бастаймыз. Алдағы екі-үш жыл ішінде ауылдарға да жетеміз. Сәл сабыр сақтасақ болғаны. Не мемлекеттік бағдарламалар арқылы, не облыс бюджетінен жөндейміз бе оны көре жатармыз,-деді облыс әкімі.Ал ауыз судың мәселесін жергілікті кәсіпкерлер бірігіп шешпек. Қазақстанның Еңбек Ері Алмат Тұрсынов:
-Бұл бәріміздің басымызға түскен қайғы. Топан судан мен аман екенмін деп отыру жарамас. Сондықтан ауыл болып, ел болып бірігейік. Осы жерде отырған әріптестерімді көмек қолын созуға шақырамын,-дейді ол.Бұдан соң облыс әкімі әр ауланы, әр үйді жеке-жеке қарап шықты. Ол тұрғындарға алаңдауға еш себеп жоқ, бәрін қалпына келтіреміз деп уәде етті. Зеленов ауылындағы тасқын ысырып әкеткен көпір қайта жасалып жатыр. Бұл – ауыл ішін жалғап тұратын жалғыз жол. Ептеп еңсе көтеріп жатқанын көріп, ауыл азаматтары өз алғыстарын айтты. Бұдан бөлек, қиын сәтте көмекке келіп, қауіптен құтқарған ТЖ қызметкерлеріне ризашылықтарын білдірді.
Кенже ҚОНЫСБАЙ
Суреттерді түсірген автор.