Жұқа мұз – жасырын қауіп

Әуесқой балықшылардың мұз ойып балық аулайтын маусымы енді басталды, ал ойын балалары үшін мұз үстінде сырғанақ тебу және қуаныш. Қостанай облысының төтенше жағдайлар департаменті жұқа мұздың қаупі туралы ескертеді.  «Солтүстік» өңірлік жасағының қызметкерлері қазіргі күні су айдындарында тәулік бойы кезекшілік атқаруда. Күшейтілген қызмет шалғай ауылдарда да рейд жүргізіп тұрады. Тобыл бойындағы әуесқой балықшылар да соңғы ескертулерден хабардар.

– Температураның көтерілуі су айдындарында қауіпті жағдайлардың туындауына әкеліп соғуы мүмкін. Сондықтан да түрлі жағдайлардың алдын алу үшін үнемі түсіндіру жұмыстары жүргізілуі тиіс. Негізінен, тәжірибесі мол балықшылар мұның барлығын біледі. Мұздың қалындығы барлық жерінде бірдей емес. Апат айтып келмейді. Балаларды үлкендердің қарауынсыз өзеннің жанына жібермеу керек, сел жүру және көктемгі тасқын уақытындағы сақтық шараларын түсіндіріңіз. Мұздың үстімен өту тек қана арнайы белгіленген жерлерде ғана болады, мұздағы ескерту және тыйым салынған белгілерге назар аударыңыздар.Алғашқы медициналық көмек көрсету туралы да айтып отыру керек, – деді «Солтүстік» өңірлік жасағы бөлімшесінің басшысы К. Әубәкіров.

Өзен-көлдердің бетіне жұқа мұз қатысымен жағаның екі жағындағы елді мекендердің тұрғындары мұздың бетімен төтелей жол салып, әрлі-берлі қатынасты бастайды. ТЖД Жедел-құтқару жасағы тұрғындарды су қоймаларының мұз қатқан бетімен өткен кезде сақ болуға шақырады.