Нұр себеле, Ұлыстың Ұлы күні ! ! !
Бүгін Қостанай қаласының көп ұлтты халқы бір шаңыраққа топтасып, Ұлыстың Ұлы күнін достық пейілмен қарсы алды. Таңмен таласа қаланың орталық алаңына ағылған жұртшылық ұлттық тағамнан дәм татып, түрлі қызықты ойын-сауықтық бағдарламаларға куә болды.
Ұлы даланың ұлық мерекесі әз Наурызды Тобыл-Торғай тұрғындары ұлттық дәстүрлерімізді сақтай отырып ұйымдастырды. Орталық алаң, әкімдіктің алдында ақшаңқан киіз үйлер тігілген. Әр шаңырақта ақ дастархан жайылып, ұлттық құндылықтарымызды дәріптейтін өнерлі жастар жиналыпты.
Алдымен, мерекелік сахнаға Қостанай қаласының әкімі Базыл Жақыпов көтеріліп, шаһар тұрғындары мен қонақтарына ізгі тілегін жеткізді.
Бұдан соң қазақ халқының салт-дәстүрлерінен үзінділер көрсетілді. Бүлдіршіннің тұсауын кесіп, жас баланың алғаш атқа міну рәсімі жасалды. Көп ұзамай мерекенің басты кейіпкері әрі сыйлы қонағы Қыдыр ата да келіп, көпшілік қауымды Ұлыстың Ұлы күнімен құттықтап, ақ батасын берді. 
Балуандар күресіп, мергендер асық атып, білектілер арқан тартысып, ұлы тойдың көркін қыздыра түсті.
«Жыл басы жақсы басталса, аяғы да жақсы болмақ» деген қағиданы берік ұстанған халық мерекелік алаңнан тарқамай, той-думанды ақырына дейін тамашалады. Жасы мен кәрісі әр үйден дәм татып, игі күндерде кездесуді тілек етіп жүр.
Ал, мерекеге арнап киіз үй тіккен мекемелердің ішінен Ахмет Байтұрсынов атындағы Қостанай мемлекеттік университетінің шаңырағы ерекше әдемі деп танылды.
Суреттерді түсірген Айбек ЖҮЗБАЙ
