Тасқын қаупіне тосқауыл (фоторепортаж)
Тобыл өзенінің жағалауында республикалық «Көктем-2017» командалық-штабтық оқу-жаттығу жиындары өтті. Қостанай облысының әкімі Архимед Мұхамбетовтің, ҚР Ішкі істер министрінің орынбасары Юрий Ильиннің қатысуымен көктем мезгіліндегі тыныс-тіршілікті қамтамасыз ету үшін инфрақұрылымдық, коммуналдық, энергетикалық, көлік коммуникация нысандарының дайындығы тексерілді.
– 59 елді мекен қатаң бақылауда тұр. Қауіп төнуі мүмкін аймақтардың қатарында Ұзынкөл, Қарабалық, Қостанай, Науырзым, Қарасу және Әулиекөл аудандары бар. Ол аймақтарда қардың қалыңдығы жылдағы нормадан тым асып кеткен. Сондықтан су басуы ықтимал деген жерлерде үнемі кезекшілік қойып отырмыз. Өңірдегі құтқару жедел жасағының құрамына 2119 адам кіреді. Барлық апаттық-құтқару қызметтері оқу-жаттығу жұмыстарын жүргізіп жатыр. Жылу жүйелері, газ құбырлары тексеріліп, құтқарушылар оқыс оқиғаларда жылдам әрекет ету үшін дайындықтарын пысықтады, – деді Қостанай облысының ТЖД АҚ басқармасының бастығы подполковник Руслан Орынбеков.
Болжау жұмысы мен диспетчерлік қызмет, мониторинг жүргізу, материалдық-техникалық қор, азық-түлік пен медициналық резервтер құру – басқарманың тікелей міндеті. Тұтастай алғанда, төтенше жағдайды тосып отырмай, оның алдын алу шараларын жүргізуде дамылсыз еңбек ету керек. Бұл туралы облыс әкімі Архимед Мұхамбетов айтты.
– Осындай оқу-жаттығу кезінде су өткізу орындарының, селге қарсы және басқа да инженерлік құрылғы қорғанысының, жүзу құралдарының сапасы анықталады. Жанар-жағар май, азық-түлік, дәрі-дәрмек қоры әлі де толықтырылуы керек. Аудандық және облыстық әкімшіліктерде тәуліктік кезекшілік ұйымдастырылсын. Қардың еруі мен өзеннің ағысын тұрақты бақылаңыздар. Құм салынған қапшықтарда олқылық болмасын. Апат айтып келмейді. Сақ болыңыздар! – деді облыс әкімі.
Жалпы жедел құтқару тобына ҚР ІІМ ТЖК-нің өңірлік жасағы, өрт сөндіру және апаттық құтқару қызметі, медициналық орталығы бригадасы, сондай-ақ, жергілікті күштік құрылымдар, облыстық, қалалық төтенше жағдайлардың алдын алу мен оны жою комиссиясының өкілдері кіреді. Оқу-жаттығу барысында су тасқыны уақытында гидротехникалық құрылғылардың, көліктік коммуникациялардың, құлақтандыру жүйесінің төтенше жағдайларға әрекет етуі де бақыланады.
Жедел құтқару тобының 829 техникасы тексеруден өтті. Олардың арасында жол талғамайтын көліктер (трикол, бронто), қайықтар мен салдар да бар.
ҚР Ішкі істер министрінің орынбасары Ю.Ильин сапар барысында ТЖ департаментінің бөлімшелері – өрт сөндіру және авариялық-құтқару, бірыңғай кезекші-диспетчерлік қызмет басқармасына, Қостанай қаласының № 1, № 2 өрт сөндіру бөлімдеріне, кәсіби дайындық мектебіне, Солтүстік өңірлік аэромобильді жедел-құтқару жасағына, ведомстволық мұражайға және Қостанай облысының ІІД-не барып, соңғы дайындық жұмыстарын бақылады.
Қасқырбай ҚОЙШЫМАНОВ
Суреттерді түсірген Айбек ЖҮЗБАЙ
