Ескі көліктерді қабылдау жалғасады

Өткен жылдың 21 қарашасы мен 30 желтоқсаны аралығында елімізде тозығы жеткен көліктерді өткізуді ынталандыру бағдарламасының пилоттық жобасы жүзеге асырылды. Аталған уақыт аралығында ӨКМ Операторының қабылдау бекеттеріне 5665 автокөлік тапсырылған. Ескі көліктерді қабылдау қорытындысы бойынша Шымкент қаласы бірінші орында тұр. Бір айдан астам уақыт ішінде оңтүстік аймақта 764 автокөлік тапсырылған. Қостанай облысы 688 көлік өткізіп, екінші орынға шықты. Үшінші орындағы Алматы облысының еншісінде 496 ескі көлік. Пилоттық жоба биыл да жалғасады. Бағдарламаның келесі кезеңінде бірнеше жаңашылдықтар бар. 

2016 жылы ҚР энергетика Министрлігі жеке және заңды тұлғалардан ескі көліктерді сатып алуға 10 мың квота бөлген болатын. Жылдың қорытындысында 5 665 автокөлік қабылданды. Қалған 4 335 квотаны игеру 2017 жылдың 16 қаңтарынан бастап жалғасын табады. Қостанай облысы аталған жұмысқа 25 қаңтардан бастап кіріпек.
-Биыл экология жылы. Астана төрінде «EXPO-2017» халықаралық көрмесі өтеді. Сондықтан қала мен ауылды тозығы жеткен көліктерден тазартудамыз. Қазір біз қабылдау бекетінің алаңын кеңейтудеміз. Бағдарламаның алғашқы кезеңінде ескі көліктерді қабылдау, сақтау, күзету жұмыстары жасалса. Бұдан былай автокөлікті жоюға әзірлене бастаймыз. Экологиялық талаптарды сақтай отырып, аккумулятор, шиналар шешіп алынады. Техникалық сұйықтықтарды стандартқа сай арнайы ыдыстарға құямыз. Осылайша, қайта өңдеуге кірісеміз. Дайын металдар Қарағандыдағы зауытқа жіберіледі. Металлургиялық зауыт биыл немесе алдағы жылы іске қосылмақ,-деді «ӨКМ Операторы» ЖШС Қостанай облысы бойынша аға менеджері Вячеслав Клинковский.Көлік қабылдаудың бірінші кезеңінде Жітіқара және Рудный қаласы белсенділік танытты. Рудный қаласындағы бейтаныс ата-әже ескі көлігін тапсырған сәтте көздеріне жас алып, темір тұлпармен қимай қоштасқан.
-Аудан, ауылдардың тұрғындары көліктерін өздері әкеліп тапсырады. Біздің бекетте қабылданбай қалған он шақты көлік тұр. Себебі, техниканың иелері кезінде автомобиль салығын немесе айыппұлын төлемеген. Автомобильді есептен шығару кезінде ұзақ жыл ұмытылып келген салық пен айыппұлға қайтадан кез боласыз. Сондықтан, құжатты мұқият дұрыстау керек,-дейді В.Клинковский.Ескі көліктерді ақшаға тапсыратындар үшін бағдарламаның биылғы жаңашылдықтарын атап өтейік.
– Республика бойынша 11 қаңтардан бастап электронды кезек жүйесі енгізіледі. Ол үшін ӨКМ Операторының Call орталығына, 8 800 080 08 65 телефон нөміріне хабарласуға немесе auto.recycle.kz сайтына кіріп, арнайы форманы толтыру арқылы кезекке тұруға болады;
– Сенімхат үлгісі өзгерді;
– Ескі көліктің орнына берілген ақша клиенттің шотына 15 банктік күннің ішінде түседі;
Сонымен қатар, 2017 жылдың маусымынан бастап жүк көліктерін, ауыл шаруашылығы мақсатындағы техникаларын қабылдау жоспарда тұр. ӨКМ Операторы ескі көлікті ақшалай сертификатқа айырбастауға дайындық жүргізуде. Бұдан былай ескі көліктің орнына төленетін қолма қол ақшаның орнына сертификат беріледі. Сертификатты жаңа көлік сатып алу кезінде пайдалана аласыз. Осылайша отандық автоөндіріске қолдау білдіреміз.Жоюға тапсырылған танымал көліктердің қатарын «ВАЗ-2105», «ВАЗ-2106», «ВАЗ 2101», «ГАЗ 3110», «Москвич-2140», «Мазда 626» сияқты техникалар құрайды. Бағдарлама бойынша тапсырылған ең ескі көлік құралы 1948 жылы шығарылған «Москвич» автокөлігі болды. Оны Орал қаласының тұрғыны тапсырған.

 

Қымбат ДОСЖАНОВА
Суретті түсірген Бағдат АХМЕТБЕКОВ.