Қостанайдағы ХҚКО-да бәрі қалыпша
Уақытша тіркеу заңы Қазақстанның әр өңірінде қоғамдық талқы тудырғаны рас. Тұрғындардың титығына тиген бұл оқиға ешкімді де бейжай қалдырмады. Бүгін облыс әкімі Архимед Мұхамбетов мәселенің мән-жайын білу үшін Қостанайдағы Халыққа қызмет көрсету орталығына арнайы ат басын бұрды.
Мұнда еліміздің басқа облыстарындағыдай қарбалас жоқ. Әр азамат өзіне тиесілі сұрақтар бойынша жауабын алып, байсалды қызмет көрсетілуде. Жаңа заңның талабына бағынып, уақытша тіркелуге келгендер де жоқ емес. Бірақ еш ұзын-сонар кезекке тұрмайды. Өйткені, мұндағылар әлеуметті әуреге салып, әбігерлік туғызып жатқан жоқ. Мекеме кешкі сағат 20.00-ге дейін немесе келушілер қарасы азайғанша күтеді. Бұл туралы ХҚКО-ның директоры Еркін Жұмабай обылс әкіміне тиянақты түсіндірді. 
– Әзірше уақытша тіркеу жайында тұрғындар наразылықтарын айтып немесе қарбалас тудырмады. Әдеттегі жұмысымызды істеудеміз. Біреуі тұрғылықты мекенжай анықтамасын алуға, енді біреуі жеке куәліктерін ауыстыруға келіп жатады. Көші-қон полициясының қызметкерлері де осында. Олар бөлек, екінші қабатта қызмет көрсетеді,-дейді Е.Жұмабай. 
-Жаңа заңға қатысты түсіндіру жұмыстарын жүргізіңдер. Облыстағы қалалар мен ең ірі аудандарда қызмет көрсететін мамандар санын арттыру керек. Бәрі қалпына келмейінше, жұмыс кестесі осы күйінде қалсын,-деді обылс әкімі.
Кенже ҚОНЫСБАЙ.
Суреттерді түсірген Бағдат АХМЕТБЕКОВ.
