Ертең 40 градус аяз болады

Қыс қаһарына мінді. Қостанай облысында 21-не қараған түні сынап бағанасы 30-35 градусқа дейін төмен сырғиды, ал күндіз аяз екпіні 25-30 градусты көрсетпек. Мұндай жорамалды "Қазгидромет" РМК жасады.

21 желтоқсанда түн мезгілінде облыстың солтүстік өңірлерінің кейбірінде үскірік -40 градусқа дейін жетпек. Ал оңтүстікте аяз сынап бағанасын 23-ші белдемге тұралатпақ. Нақ Қостанайда түнгі ауа райы -31−33˜, күндіз 23-25 градусты көрсетеді.

Сондай-ақ, алдағы тәулікте облыс орталығындағы жел жылдамдығы секундына 9−14 метр, кейбір жерде 20 метрге дейін жететінін болжайды. Мұндай ақшұнақ аяздың жиілеуін метеорологтар Қазақстан аймағына Арктикадан салқын ауа массасының кіруімен түсіндіреді. Бұл солтүстік антициклонның ықпалымен байланысты.