Алаяқтарға алданбас үшін…
Тәртіп сақшылары қала тұрғындарын алаяқтардың құрығына түсіп қалмауға шақырады. Әдетте, оңай олжа іздейтіндер қандай бір қиын іске бармайды. Олар үшін ең бастысы адамның сеніміне кіру жеткілікті.
Қостанайлық 14 жасар жасөспірім ноутбугімен қолтығына қыстырып,далаға шыққан. Осы сәтті жіті қадағалап тұрған 18 жасар бейтаныс әлгі баладан ноутбуктен ойындар жүктеп алуға өтініш жасайды. Баланы оңай алдап соққан ол оқиға орнынан із жасырып үлгереді. Табан астында танымайтын біреуге жем болған жасөспірімнің шешесі полиция бөлімшесіне хабарласқан.Шұғыл жүргізілген шаралардың арқасында тәртіп сақшылары күдіктіні алысқа ұзатқан жоқ.Ол Астана қаласының тұрғыны болып шықты.Ұрланған ноутбук иесіне қайтарылды.
Тағы бір мысал. 19 шілде күні қостанайлық 45 жасар әйел адамның ұялы телефонын белгісіз біреу қоңырау шалу үшін сұрап алған. Әлгі азаматша бөгде кісіні танымаса да телефонды қолына ұстатқан. Осы сәтте алаяқ зыта жөнеліпті. Жәбірленуші полиция қосынына шағымданғанмен, күдіктінің түр-түсін есіне сақтап қалмапты.
Әлібек Ыбырай
