Қонысбек кино түсіруді қолға алды
Жақында қазақ киносы тағы да бір тарихи туындымен толығуы мүмкін. Бұлай деуімізге себеп, Қостанайда қысқа метражды көркем фильмнің түсіру жұмыстары басталды. Оны І.Омаров атындағы облыстық қазақ драма театрының әртісі, Қазақстанның еңбек сіңірген қайраткері Қонысбек Бегайдаров қолға алды. Оқиғаның желісіне 17-18 ғасырлардағы елінің азаттығы жолында шайқасқан қазақ батырларының өмірі арқау болады.
Тобыл бойында түсірілетін тұңғыш туындының демеушісі – режиссердің өзі. Фильмде басты рөлдерді сомдайтын әртістер түгел белгіленді. Әзірге олар театр сахнасында өз рөлдерін пысықтау үстінде. Ашық даладағы түсірілім алдағы апталарда басталады. Киноның аты әзірге құпия. Бәрі сәтті өтсе, көркем суретті тарихи шежіре күзге салым көрермендердің көзайымына айналуы ғажап емес.
Әлібек Ыбырай
