“Біз – келешектегі Отан қорғаушылармыз”

Осындай атаумен Ш.Уәлиханов атындағы орта мектебінің ұжымы 7 мамыр – Отан қорғаушылар меркесіне орай мектеп оқушылары арасында әскери сайыс өткізді.

Сегіз бөлімнен тұратын бұл сайыста мектеп оқушылары өздерінің әскери дайындыққа ептіліктері бар екендігін байқатып, шеберліктерін таныта білді. Әсіресе, саптық жаттығу мен жауынгерлердің сәлемдесу рәсімі бөлімінде төменгі сынып оқушылары сайыс ережесіне сай берілген тапсырмаларды бұлжытпай орындады. Сайыстың әрбір бөлімінің арасында патриоттық әндер шырқалып отырды.

Оқушылар арасындағы әскери сайысқа қазылық жасаған аудандық қорғаныс істер жөніндегі бөлім басшысы, майор Қайрат Төлебаев, білім беру бөлімінің әдіскерлері Бейбіт Қосмағанбетов, Аян Құсбек және аталмыш мектептің алғашқы әскери дайындық пәнінің мұғалімі Бақыт Мизамбеков кеткен кемшілік тұстарды тілге тиек етіп, төрелігін дөп басып айтты.

Сайыстың қорытындысы бойынша бас жүлдені 5-сыныптың намысын қорғаған “Жасұлан” тобы иеленді. Бірінші орынды 6-сынып оқушылары, яғни “Барлаушылар” тобы жеңіп алды. Екінші тұғырға көтерілген 7-сынып оқушыларынан құралған “Болашақ” тобынның қуанышында шек болмады. Ал, үшінші орынды 9-сыныптың “Теңізшілер” тобы місе тұтты.

Ш.Уәлиханов атындағы орта мектебінің директоры Жанат Темірова әскери сайыстың куәсі болған меймандарды айтулы мерекемен құттықтап, мектеп оқушыларына оқуда озат, еліміздің Отан сүйгіш патриоттары атана беруіне тілектестігін білдірді.

 

Байбатыр НИЯЗБЕКҰЛЫ,

Жанкелдин ауданы.