Жол бойындағы қоғамдық қабылдау
"Нұр Отан" партиясының Қостанай қалалық филиалы мен темір жол вокзалының қызметкерлері бірлесе отырып, жол бойында қоғамдық қабылдау өткізді. Аталмыш бастама партияның "Stop – қылмыс" жобасының аясында жүзеге асып жатқанын айта кеткен жөн.
Жоғарыда аталған партияның қоғамдық қабылдау бөлімінің жетекшісі Татьяна Курц бастаған топ "Қарағанды-Брест" бағытында жол жүріп бара жатқан жолаушыларға жолығып, өтініштеріне құлақ асты. Ерекше үлгіде қолға алынып отырған қабылдау осымен 3-рет ұйымдастырылғанын айта кеткен жөн. Қабылдауда өз өтініштері мен тілектерін білдірген азаматтар көп болды. Солардың бірі – Қарағандыдан Уфаға кетіп бара жатқан Екатерина Иванова вагондарға wi-fi мен радиожелісін қосуды сұраса, Белоруссия азаматы Игорь Сморщек поездің баяу жүретініне көңілі толмайтынын айтады.
Ал, партия өкілдері жолаушылар тарапынан келіп түскен әрбір өтініштің оң шешімін табатынына сендірді.
Мешіт ҒАЗИЗ.
