ТЕГІН ОҚУҒА МҮМКІНДІК АЛДЫ

Рудный индустриялық институтында ректор гранты үшін өткен кешенді олимпиаданың қорытындысы шығарылды.

Білім додасына Рудный мен Лисаков қаласының түлектері қатысқан болатын. Институттың конкурстық комиссиясының шешімімен «Математика» және «Сурет салу» бағытында №4 мектеп-лицейдің оқушылары Ю.Прохорова мен Л.Шайсұлтанова, «Физика» бағытында №1 мектептің түлегі Н.Өтебаев жеңімпаз деп танылды. Енді олар Ұлттық бірыңғай тестілеуден 50 ұпайдан артық алса, Рудный индустриялық институтына оқуға тегін қабылданады. Тағы 8 оқушы осы оқу орнын таңдаған жағдайда оқу ақысын 20 және 30 пайыздық жеңілдіктермен төлеуге мүмкіндік алды.

– Дәстүрлі шараға биыл 300-ге тарта түлек 5 бағыт бойынша қатысты. «Химия» және «Информатика» бағытында үміткерлер қажетті ұпайды жинай алмағандықтан, жеңімпаз анықталған жоқ. Олимпиаданың басты мақсаты білімді, дарынды оқушыларды ынталандырып, біздің жоғары оқу орнында білімін жалғастыруға қолдау көрсету, – дейді қабылдау комиссиясының жауапты хатшысы Марина Мұстафина.

 

Қуаныш ЕСҚАБЫЛ