Барлығы биліктің бақылауында (БЕЙНЕБАЯН)
Қостанайға кіре берістегі Гагарин көшесідегі үлкен көпірдің астын су басып, қозғалыс шектелген болатын. Тиісті мамандар мәселені дер кезінде қолға алса да, Федоров, Қарабалық ауданы, одан әрідегі Ресейдің Челябі облысына шығатын халықаралық маңызы бар жолдың бастауы әлі ашылар емес. Бүгіндері бұл нысанда 5 техника, үш сорғы іске қосылған. Алайда, көпір астындағы жол сайда болғандықтан, қырдан еріген қар суы осы маңға кеп жиналады. Әзірше көлкіп тұрған қар суын жол бойынан ары асырып төгуден басқа амал табылмай тұр. Облыс әкімі Архимед Мұхамбетов мән-жайдың мәнісін бақылау үшін сол маңға арнайы ат басын бұрды. Қостанай қаласының әкімі Базыл Жақыпов пен ТЖД-нің басшысы Талғат Кәкімовке техника санын көбейтуді тапсырып, қысқа мерзім ішінде жолды ашу керек екенін ескертті.
Сонымен қатар, Қостанай-2 ықшам ауданындағы тұрғындардың хал-ахуалымен танысты. Бұл маңдағы үйлердің ішіне дейін су кірген. Өңір басшысы әр үйдің ауласын қарап, кебірнің баспанасына да бас сұқты.
Бұдан соң әкім су басу қаупі басым Қостанайдың іргесіндегі Дружба ауылына аттанды. Бұл жақта бәрі тәртіп бойынша. Әр аймаққа бақылаушы қойылған, техника мен керек-жарақтар сақадай сай тұр. Ауыл ішінде пайда болған шалшық суды тез арада құрғатып отырады. А. Мұхамбетов егер төтенше жағдай бола қалса, ауыл тұрғындарын да жұмылдыру керектігін айтты.
-Аландауға еш себеп жоқ. Бәрі бақылауда. Ауылдың қауіпсіздігі үшін тағы екі сорғы алдыртамыз. Құтқарушылар су басуы мүмкін барлық аймақтарда кезекшілік етеді. Қауіптің беті ары қарағанша барлығы биліктің назарында болады,-деді облыс әкімінің орынбасары Ғауез Нұрмұхамбетов.
Кенже ҚОНЫСБАЙ.
Суреттерді түсірген Бағдат АХМЕТБЕКОВ.