Тәуелсіздікке тарту

ҚР Тәуелсіздігінің 25 жылдық мерейтойына орай Сарыкөл ауданында «Светлана» шағын сауда маркеті ашылды.

Сарыкөлдік тұрғындарды арзан әрі сапалы азық-түлікпен қамтамасыз ету мақсатында өз жұмысын бастаған бұл сауда нысаны «Бизнестің жол картасы-2020» мемлекеттік бағдарламасы аясында жүзеге асырылып отыр.

Жалпы, қарапайым дүкенін шағын сауда нүктесіне айналдырып, бизнес көзін кеңейткен кәсіпкер  Светлана Хижникова он жылдан бері саудамен айналысып келеді.

-«БЖК-2020» мемлекеттік бағдарламасы  – шағын және орта бизнесті дамытуға айрықша серпін беретін жоба. Мемлекет қолдауының арқасында біз кәсібімізді ұлғайттық, жаңа жұмыс орындарын аштық, – деді кәсіпкер өз сөзінде.

Сауда нүктесінің ашылу салтанатына аудан әкімі Эльдар Күзенбаев арнайы келіп, халық игілігі үшін қолға алынған жұмыстың жемісті болуын тілеп, кәсіпкермен бірге сауда нүктесінің лентасын қиды. 

Бұл күні сауда жасауға асыққан сарыкөлдіктердің санында қисап болмады. Әсіресе, алғашқы сатып алушы өңір басшысының өзі болды. Сондай-ақ, алғашқы тұтынушылардың бірі  Людмила Беккер тосын сыйға кенелді.

-Бүгін бәріміз үшін аса қуанышты жәйт. Ашылып жатқан шағын маркеттің бағалары қолжетімді, қаладағы супермаркеттердегідей барлығы бар. Сатушылар да жұршылықты жылы жүзбен қарсы алып, өз жұмыстарын тиянақты атқаруда. Дүкенге жиі келіп, қажетті тауарларды алып тұратын боламыз,-дейді тағы бір тұтынушы Роза Макина.

Қысқасы, сарыкөлдіктерге сый болған шағын маркетте күнделікті сұранысқа ие азық-түлік тауарлары мен шұжық өнімдері және тұрмыстық заттар сатылады. Бағалары да қолжетімді.

 

Руслан ӘЛКЕЕВ.

Сарыкөл ауданы.