«Алғысым шексіз, Қазақстан!»
Алғыс айту күні – қазақ халқына тән қайырымдылықтың, қамқорлық пен қонақжайлықтың нышаны. Осы мереке қарсаңында облыста көптеген іс-шаралар мен қайырымдылық акциялары ұйымдастырылуда. Соның бір парасы – Сити-орталықта өткен «Қостанай – достық мекені» атты мерекелік шара.
Концерттік бағдарлама Қостанай педагогикалық колледжі студенттерінің ән шашуымен басталды. Содан соң Қостанай қаласының әкімі Базыл Жақыпов барша облыс тұрғындарын айтулы мерекемен құттықтады. 
– Былтырғы жылдың сәуір айында өткен Қазақстан халқы Ассамблеясының ХХІІ сесссиясында Елбасы Нұрсұлтан Назарбаев 1-наурызды барлық этностардың бір-біріне Алғыс айту күні деп жариялау туралы ұсыныспен сөз сөйлеген. Расында да бұл күн бізді бұрынғыдан да гөрі жақындастыра түспек. Олай дейтін себебіміз, елдің дамуы – бірлік пен ынтымақтың арқасында. Осы күн мейірімділіктің, бүкіл қазақстандықтардың бір-біріне деген достығы мен махаббатының жарқын мерекесі іспетті. Мен Қостанай өңірін мекендеген барша тұрғындарды Алғыс айту күнімен құттықтаймын. Әрқашан аспанымыз ашық, еліміз тыныш болсын, – деді.
«Біз – Қазақстанның болашағымыз» атты флэшмобқа жиылған жастардың дені қатысты. Ал белгілі әнші, домбырашы Азамат Мұқатов Шәмшінің «Арыс жағасындасын» нақышына келтірсе, жас өнерпаз Азамат Ибраев «Мен – қазақпын» әнін орындап, жұртты желпіндіріп тастады.
Бүкілқазақстандық бірліктің бірегей моделін қалыптастыруда Қазақстан халқы Ассамблеясы маңызды рөл атқарады. Бұл бірегей институт еліміздегі барлық этнос өкілдерін ортақ мақсатқа ұйыстыра отырып, республикадағы тұрақтылықты сақтау мен ел дамуының мақсатына айтулы үлес қосып келеді. Осы шарада сөз сөйлеген тәжік этно-мәдени орталығының төрағасы Эргашвой Халметов пен корей этно-мәдени орталығы төрағасының орынбасары Марина Лян қазақ халқының қонақжайлығы мен ауызбіршілігіне зор мән берді.
Қасқырбай ҚОЙШЫМАНОВ
Суреттерді түсірген Бағдат АХМЕТБЕКОВ
