“Қазпошта” бөлімшелері жаңа көліктерге ие болды

Бүгін облыс әкімі Архимед Мұхамбетов “Қазпошта” АҚ-ның облыстық филиалында болып, пошта қызметінің тыныс-тіршілігімен және осы саладағы жаңа өзгерістермен танысты. Бұған қоса, әкім өңірдің пошта бөлімшелеріне су жаңа көліктердің кілтін табыс етті.

Ел Тәуелсіздігінің 25 жылдығына орайластырылған бұл шарада сөз алған өңір басшысы осының бәрі елдің әлеуметтік-экономикалық ахуалын дамытуға бағытталған игі шаралардың бірі екендігін жеткізді.

 

-Биыл еліміздің Тәуелсіздігіне – 25 жыл. Осы жылдар ішінде Қазақстан табысты әлеуметтік-экономикалық реформаларды жүзеге асырып, алдыңғы озық мемлекеттердің қатарынан орын алды. Бүгінгі шара да халықтың игілігі үшін жасалып отыр. Жалпы, облыста қазір 1300-ден астам адам халыққа пошталық, қаржылық және агенттік қызмет көрсетуде. Бүгінге дейін облысымызда 93 көлік халыққа уақытылы хат-хабар тасылмалдаса, міне, бүгін солардың қатарына жаңадан 22 автокөлік қосылып отыр. Соның ішінде қуантып отырғаны – шалғайда орналасқан Аманкелді, Жанкелдин аудандары мен Арқалық қаласына да жаңа автокөліктердің берілуі. Бұл, әрине, сол өңірлердегі халыққа газет-журналдарды, хат-хабарламаларды уақытылы тасымалдауға үлкен септігін тигізетіндігі сөзсіз. Барлық пошта қызметкерлерін осы қуанышты жағдаймен құттықтай отырып, жұмыстарына табыс, зор денсаулық, отбастарына амандық тілеймін, – деді облыс әкімі А.Мұхамбетов.

Қарлығаш Оспанова 

Суреттерді түсірген Бағдат Ахметбеков