Еңбектенгенді еңбек көтереді

Бүгінде  Қостанай облысының үкіметтік емес секторы қоғамдағы  ең белсенді азаматтық институт болып табылады.  Жылдан жылға  азаматтық ұйымдардың саны өсіп отырғаны соның дәлелі деп айтуға болады.  Мысалы, қазіргі кезде  өңірімізде 773  үкіметтік емес ұйым бар, яғни орташа есеппен 6 пайызға өсіп отыр.

Бірнеше жылдардан бері облыстық ішкі саясат басқармасының мемлекеттік әлеуметтік тапсырысы  аясында үкіметтік  емес секторы  жоғары деңгейде жұмыстар жүргізіп келеді.  Облыстық «ГрИн» азаматтық альянсы қоғамдық қорының төрайымы Динара Өтебаеваның айтуынша,  мемлекеттік әлеуметтік тапсырысты жүзеге асыру – бұл мемлекеттік органдар мен үкіметтік емес секторының өзара  бірлескен іс-қимылының ең тиімді тәсілі болады. Үстіміздегі жылы үкіметтік емес ұйымдармен осы тапсырыс аясында облысымыздағы он басқарма  жұмыс істеді.

2015 жылғы қараша айында  үкіметтік емес ұйымдардың конкурсы өткен еді. Конкурсқа облысымыздағы елуден астам үкіметтік емес ұйымдар қатысты.  Нәтижесінде  жеті номинация бойынша жеңімпаздар анықталды.  Жеңімпаздарды марапаттау іс-шарасына облыстық ішкі саясат басқарма басшысы  Ж.Мақанов қатысып, жеңімпаздарды құттықтады, жылы лебізін білдіріп, грамота мен бағалы сыйлықтар табыстады.

Гүлназым САҒИТОВА

Суретте: іс-шарадан көріністер

Суреттерді түсірген Айбек ЖҮЗБАЙ