Дәстүр мен жаңашылдық тоғысқан

Білекпен емес, біліммен санасатын заманда Елбасымыз көрегенділік танытып, зияткерлік мектептердің іргесін қалады. Бұл оқу ордасы ертеңгі елдің болашағын бүгін білім нәрімен сусындатып келеді. 

Назарбаев зияткерлік мектебі Қазақстанның әр қаласында бой көтерді. Білім ошақтары қолданысқа берілгеннен бастап, алдына жоғары талаптар қойып, биік мақсаттарды көздеді. Айтулы мектепте шәкірт болу да, ұстаздық ету де – үлкен жетістікпен бара-бар.

Қостанай қаласындағы зияткерлік мектеп жемісті жұмыстарын жалғастыруда. Мұнда облыстың әр түкпірінен келген озат оқушылар тәлім алып жүр. Мұғалімдер де сынақ тапсырып, тек мықты мамандар ғана алынады. Жас та болса ұрпақты білімге баулып жүрген мамандардың қатары көп.

Солардың бірі – Мөлдір Мұстафина. Өзі Тәуелсіздіктің құрдасы. Әулиекөл ауданының тумасы. Өнер пәнінің мұғалімі. Ұстаздық ету Мөлдірдің бала күнінен бергі арманы. Ол Назарбаев мектебінде қызмет етіп жүргенін зор мақтаныш тұтады. Білім алуға барлық жағдай жасалған. Кэмбридж тәсілімен жан-жақты білім беріледі. Қазақы салт-дәстүр де қаперде ұсталған. Дәстүр мен жаңашылдық тоғысы бар. 

-Елбасы әрдайым «Болашақ – жастар қолында» деп айтады. Ал болашақты тәрбиелеу – ұстаздардың қолында. Сол себепті, тынымсыз еңбек етуге тырысамын. Тәуелсіздік алғанына 24 жыл толып отырған жас мемлекеттің өркендеуіне бар үлесімді қосқым келеді. Ел Президенті болашағымыздың жарқын болуы үшін осындай мектеп ашып, барлық жағдай жасап берді. Тіпті, Оңтүстік Африка және Филиппин сияқты шет мемлекеттерден келген білікті ұстаздар білім беруде. Бұл – елдің дамуына қосылған үлкен үлес. Біздің де білікті болуымыз міндетті. Мемлекет болашағы үшін тамшыдай үлес қоса алсаң, бұдан асқан бақыт жоқ!,-дейді М.Мұстафина.

Елбасының атындағы зияткерлік мектеп алда келе жатқан Тұңғыш Президент күніне ерекше дайындалуда. Өнер пәнінің оқытушысы Мөлдір Мұстафина соның бел ортасында жүр.  Ол 1-желтоқсан күні тойланатын мереке қарсаныңда оқушылар арасында сурет байқауын өткізбек. Президент, отансүйгіштік тақырыбында суреттер салғызып, жеткіншектер шеберлігін шындамақ.

Тұңғыш Президент мектебі оқушыларға көп мүмкіндік сыйлап, елдегі білім деңгейін көтеруге, жарқын болашақ қалыптастыруға ден қоюымен ерекшеленеді. Зияткерлік білім ошағының шәкірттері оқу ордасын тәмамдап шыққаннан соң  шет елдерге барып, білімдерін тереңдетеді. Сөйтіп, төрткүл дүниенің түпкір-түпкіріне барып, халқымыздың асыл қасиетін насихаттамақ.      

   

Суреттерді түсірген Бағдат Ахметбеков