Төлегеновтерге – темір тұлпар

Берекелі де мерекелі Төлегеновтер шаңырағы тағы бір шаттыққа кенелді.  «Мерейлі отбасы» ұлттық байқауының облыстағы жеңімпазы, республикалық кезеңнің қатысушылары Volkswagen Transporter маркалы шағын автобусының кілтіне ие болды. Төлегеновтерге мұндай құрметті «КМF» шағын несиелеу ұйымы көрсетіп отыр.

-Мен өзім осы «КМF» ШНҰ Қостанай облыстық филиалында жүргізуші болып жұмыс істеймін. Өткенде, «Мерейлі отбасы» ұлттық байқауынан соң Алматыдағы бас кеңседен осындай қуанышты жаңалық жетті. Ұйымның бас директоры Шалқар Жүсіпов хабарласып: «Сендер байқаудың республикалық кезеңінде жүлделі орыннан көріне алмағандарыңмен, біз үшін жеңімпазсыздар. Сондықтан сіздерге ұйым атынан шағын автобус сыйлаймыз»,-деп шаттыққа бөлеп тастады. Оларға Алла разы болсын, шексіз алғысымызды білдіреміз! – деп ағынан жарылды отағасы Нұрлан Төлегенов.

Отағасы бұл үр жаңа темір тұлпарды облыс орталығындағы Motors KST  автоүйінен, ерік берілгендіктен, өзі барып таңдағанын айтады. Кейін, уәде етілгендей, Алматыдағы бас кеңседен Нұрланның шотына 12 млн.теңге аударылыпты. Бүгін шағын автобустың кілтін «КМF» ШНҰ өкілдері оңтүстік астанадан арнайы келіп табыстады.

Бұл отбасының тоғыз бала тәрбиелеп отырғанын осыған дейін де айтқан едік. Тұңғыштарынан өзгесін Қостанайдағы «Дельфин» балалар үйінен асырап алып, бауырларына басқан. «Шынымен де бұл – қойынға сыймайтын қуаныш. Осы уақытқа дейін отбасымызбен қалаға барар болсақ, таксимен үш рет қатынауға тура келетін еді. Енді,міне, еркін сыйып, барар жерімізге бірге жететін болдық»,-деп жымиды Гүлжауһар Төлегенова.

Төлегеновтерге танытылып отырған атымтайлық бұл ғана емес. Өздері тұратын Әлжан ауылында салып жатқан екі қабатты үй құрылысына да қаржылай көмек көрсетілетін болды. Бұл материалдық қолғабысты отбасы  «Ортақ үйімізді бірге салайық!» акциясы аясында иеленгелі отыр.

 

Жандос Жүсіпбек