Тұнып тұрған қате

Бүгін, 22 қыркүйек  Қазақстан халықтарының тілдері күні. Осынау айтулы күні «Жас Отан» ЖҚ Қостанай облыстық филиалының өкілдері облыстық тілдерді дамыту басқармасымен бірлесе «Таза тіл» акциясын өткізді.
Басқарма өкілдері белсенді жастармен бірге қала көшелерін аралап, мемлекеттік тілде қате жазылған сыртқы жарнамаларды анықтады. Көзге түрпідей тиетін жазуларды көріп қана қоймай, шағын және орта бизнес өкілдеріне ҚР «Тіл туралы» заңының талаптарын түсіндірді. Қолданыстағы заңнаманың 21-бабында «…Бланкiлер, маңдайшалар, хабарландырулар, жарнамалар, прейскуранттар, баға көрсеткiштерi, басқа да көрнекi ақпарат мемлекеттiк тiлде және орыс тiлiнде, ал қажет болған жағдайда басқа да тiлдерде жазылады.» делінген. Көрнекi ақпараттың барлық мәтiнi мынадай ретпен: мемлекеттiк тiлде – сол жағына немесе жоғарғы жағына, орыс тiлiнде он жағына немесе төменгi жағына орналасады, бiрдей өлшемдегi әрiптермен жазылады. 
Тіл жанашырлары ең алдымен Баймағамбетов көшесінен бастады. Алғашқы нысан – Баймағамбетов 160 мекенжайы. Мұндағы сыртқы жарнамалар қатеге тұнып тұр. Әсіресе, мәтіндердің мемлекетік тілдегі аудармасы түсініксіз. Сондай-ақ «Ң» мен «Қ» әріптері қазақ тіліндегі сөздерде орынды-орынсыз қолданылған. 

-Мұндай акция бұрын да ұйымдастырылды. Алдағы уақытта да жалғасатынына сенімдіміз. Бәріміздің көксегеніміз, мақсатымыз бір. Мемлекеттік тілдегі жазулар сауатты жазылса дейміз. Елдегі шағын және орта бизнес өкілдерін тексеруге мораторий жарияланғаны белгілі. Сондықтан мемлекеттік тілдің мәртебесі үшін бәріміз бірлесе жұмыс істеуіміз керек. Қазір кез келген адам аударма жұмысымен айналысады. Нәтижесінде осындай қателіктер орын алады,-деді Қостанай облысы әкімдігінің тілдерді дамыту басқармасының бөлім басшысы Жарасхан Наурызбаев. 

 

Қымбат ДОСЖАНОВА
Суреттерді түсірген Айбек ЖҮЗБАЙ.