Алаш алыптары

Қазақ халқы "Үш бәйтерек" деп атап кеткен Сәкен Сейфуллин, Ілияс Жансүгіров, Бейімбет Майлин қазақ әдебиетіне айтулы ақын, қарымды қаламгер, дарынды драматург ретінде сүбелі үлес қосты. Олардың қаламынан Қазақстанның дарқан даласы, өндіріс орындары мен еңбек адамдарының іс-әрекеттері, өмірге деген құштарлықтары, болашаққа үміт-сенімдері кеңінен көрінеді. "Үш бәйтерек" ұлттық сөз өнерін азаматтық бейне, беделімен де, қайраткер, қаламгерлігімен де биік белеске көтерді. Ұлт руханиятын даңқты туындыларымен, тақырып байлығымен, жанрлық қырларымен, көркемдік әлемімен байытты.

Міне, сол үш арыстың туғанына биыл – 120 жыл толуына байланысты аудандық балалар кітапханасы "Алаш алыптары" тақырыбында кітап көрмесін ұйымдастырып, шығармашылықтарына шолу жасады. Осы көрмеге ақындардың өмірбаянына, еңбек жолына кең көлемде тоқталып, оқушылар "Тілші", "Құлагер", "Көкшетау", "Шұғаның белгісі", тағы басқа өлеңдері мен поэмаларын мәнерлеп оқып берді.

Ұлт руханиятының үш бәйтерегі қазақ сөз өнерін талант табиғатымен де,  қалам  қуатымен  де байытқан даңқты да тұғырлы тұлғалар болып қала бермек.

Зарина Мұсабаева,

Аманкелді аудандық балалар кітапханасының меңгерушісі.