СЕНІҢ ДАУЫСЫҢ МАҢЫЗДЫ!
Рудный қаласындағы №7 мектепте орналасқан №149 сайлау бөлімшесіне бүгін таңғы 7.00-ден бастап алғашқы сайлаушылар дауыс бере бастады. Ал бір сағаттан кейін халықтың белсенділігі арта түсті. Бірінен соң бірі балалары мен немерелерін жетектеп келіп жатқандар аз емес. Бәрінің көңіл-күйлері көтеріңкі. Осы учаскеде алғашқылардың бірі болып өз таңдауларын жасаған ерлі-зайыпты зейнеткерлер Амангелді Шарапатов пен Ырыскүл Ибрагимова Өзбекстанның Зарафшан қаласынан 2002 жылы көшіп келгендігін айтады.
-Еліміз тыныш, жұртымыз аман. Қазақстан әлем елдерімен терезесі теңелді. Біз келген 2000-жылдары халықтың жағдайы қандай еді, қазір қандай? Өркендеуіміз осылай жалғаса бергенін қалаймыз. Ұрпақтарымыз бақытты болсын деген тілекпен биыл Президент сайлауына 3-рет қатысып отырмыз. Бұл күн отбасымыз үшін бір кішкентай мереке секілді, – дейді зейнеткерлер.
Бүгін кеншілер қаласындағы 85 мың сайлаушы үшін 49 сайлау бөлімшесі жұмыс істеп тұр. Олардың барлығында келушілер мен бақылаушылар үшін қажетті жағдай жасалған. Ал өздігінен жүріп-тұруы қиын азаматтарға сайлау комиссиясының өкілдері үйлеріне барып, дауыстарын беруге мүмкіндік жасауда. Сайлау учаскесі ашылғаннан бері бұл іске жауапты тұлғалар осындай өтініш берген азаматтарды аралап кетті.
Дауыс берген рудныйлықтардың жалпы санын, әрине, сайлау аяқталған соң ғана нақты айтуға болады. Алайда халықтың құлшынысына қарағанда, күн батпай жатып бұл жайт анықталатын секілді.
Қуаныш ЕСҚАБЫЛ
