Көрікті жағалау – қаланың ажары
Бұдан былай Лисаков шаһарының өзен жағалауы адам танымастай өзгеріп, көз тартар кейіпке енбекші. Сәуір айында еліміздің Өңірлік даму министрлігі 2015 жылы моноқалаларды көркейту бойынша ең үздік жобаны анықтап, соның қорытындысы бойынша Лисаков қаласының Тобыл жағалауын көркейту жобасы үздік деп танылып, 200 млн. теңге көлемінде қаржыны жеңіп алды. Жағалау аумағы жоба бойынша жас ұрпақтың ой-өрісін кеңейтуге, дәріс, экскурсияларды өткізуге арналған танымдық, мерекелік көңіл көтеру, ойын-сауық шараларын өткізуге арналған салтанатты және салауатты өмір салтын дәріптейтін спорттық-сауықтыру аймақтары болып бөлінеді.
Танымдық аймақта биіктігі 20 метрге дейін жететін шамшырақ түріндегі телескоп мұнарасы орнатылып, ол жағалауды түгел көруге мүмкіндік береді. Жағалаудың үлкен бұрышы еліміздің тарихы, табиғи-климаттық жағдайы, жер қыртысы, сәулеттік орындарын көз алдыңа келтіретін Қазақстан картасына арналады. Танымдық аймақта сонымен қатар, көрме галереясын, естелік саяжолын, "тастар бағын" орнату жоспарланған.
Кіреберісі қаланың дамуын бейнелейтін стеладан басталатын салтанатты аймақтың ортасы аспалы көпірлер, амфитеатр, ротондаларға ұласып кетеді.
