Жолы болғыш жігіттер
Бір аптаның ішінде сарыкөлдік жиырма спортшы жүлдемен оралды. Солардың бірі – Евгений Бондаренко.Ол аудандық балалар және жасөспірімдер спорт мектебінің тәрбиеленушісі, Қостанай инженерлік-экономикалық университетінің түлегі, спорт шебері. Жерлесіміз Қазақстан құрамасы сапында Словакияда өткен 17-ші қысқы Универсиадаға қатысып қайтқан болатын.
Бабы келіскен Бондаренко шаң-ғымен сырғанаудан эстафетаның үшінші кезеңінде 10 шақырымдық қашықтықты еркін еңсеріп, күміс жүлдені жеңіп алды. Алтын жүлде Ресей құрамасының қанжығасына байланды.
Сондай-ақ, Қостанайда шаңғыдан өткен облыстық чемпионатта аудандық балалар және жасөспірімдер спорт мектебінің тәрбиеленушілері, Александр Шлоссер мен Николай Степиндердің шәкірттері биік шыңнан көрінді.
Қостанайлықтармен қатар өнер көрсеткен біздің құрама II орынды еншіледі. Жекелей сынақта жеңімпаздар мен жүлдегерлер яғни, үш түрлі дистанцияда Анастасия Бойко көш бастаса, бірінші және екі рет екінші орынды Дмитрий Вакуленко, ал Анастасия Павлютина екінші және екі рет үшінші орынға көтерілді.
Руслан ӘЛКЕЕВ.
Сарыкөл ауданы.
