Мобильді карта іске қосылды

"Жас Отан" ЖҚ Қостанай облыстық филиалының белсенділері "Әлеуметтік нысандардың қолжетімділігі картасы" мобильді қосымшасын таныстырды. Бұл бастама "Кедергісіз келешек" партиялық жобасы аясында 2014 жылғы қараша айында әзірленген болатын. 

Мүмкіндігі шектеулі азаматтардың емін-еркін жүріп-тұруын қамтамасыз етудің бір жолы – қолжетімді орта қалыптастыру. Сондықтан "Нұр Отан" партиясының "Кедергісіз келешек" жобасы қолға алынды. Аталған жоба аясында жасотандықтар "Әлеуметтік нысандардың қолжетімділігі картасын" дайындады. Картаны республиканың кез келген тұрғыны пайдалана алады. Ол үшін App Store және  Play Market арқылы мобильді қосымшаны ұялы телефонға немесе планшетке көшіріп алу керек. Мобильді карта мүгедектерге аудан, қалалардағы қолжетімді әлеуметтік нысандар туралы ақпарат бермек.

– Әлеуметтік нысандардың мүгедектер үшін қолжетімді немесе қолжетімсіз екендігіне куә болсаңыз, суретке түсіріп, картаға белгілейсіз. Жеке пікіріңізді жазуға мүмкіндік бар. Қазіргі уақытта картада 8 бағыттағы нысан белгіленген. Мәселен, денсаулық сақтау саласы. Оған дәріханалар, емханалар, ауруханалар және шипажайлар жатады, – деді "Жас Отан" ЖҚ Қостанай облыстық филиалының атқарушы хатшысы Ерлан Тулетаев.

Мобильді қосымша іске қо-сылғалы бері Қостанай облысы бойынша 100-ден астам қолжетімді нысан картаға түскен. Аталған жұмыс "Жас Отан" ЖҚ облыстық филиалының жанындағы еріктілер мектебінің мүшелерінің көмегімен жүзеге асуда.

Қымбат

        ДОСЖАНОВА