Шаңғышылар шықты сайланып…
Қостанай қаласындағы М.Хәкімжанова атындағы №20 орта мектебінде 1-4 сынып оқушылары ата-аналарының арасында шаңғыдан жарыс болып өтті.
– Өзіңіз білесіз, үстіміздегі 2014-2015 оқу жылы өңірімізде отбасы мен мектептің арасындағы өзара қарым-қатынас жылы деп жариялан-ғанын. Әрине, мектепте ата-ана, мектеп, оқушы үштік одағы бірлесе жұмыс атқарса, саналы тәртіп пен сапалы білім өз нәтижесін берері сөзсіз. Сондықтан да 1-4 сынып оқушылары ата-аналарының арасында шаңғыдан сайыс ұйымдастырдық. Біріншіден, ата-аналар арасында тығыз қарым-қатынас орнату болса, екіншіден, салауатты өмір салтын насихаттау, – деді бізге мектеп директорының тәрбие ісі жөніндегі орынбасары Жансая Исмайлова.
Шаңғы жарысына барлығы он алты ата-ана қатысты. Жарысты мектептегі денешынықтыру пәнінің мұғалімдері Қ.Шәйкенов, Ч.Серікбаев ұйымдастыра отырып, ең алдымен жарыс бағдарламасымен таныстырып, қауіпсіздік ережелерін түсіндірді. Ата-аналар топ болып сайысқа түсті. Жарыс барысында ата-аналар бірін-бірі дауыстап көтермелеп, қолпаштап отырды. Тартысты өтті. Нәтижесінде бірінші орынға 2-сынып ата-аналары, екінші орынға 1-сынып және 3-сынып ата-аналары ие болды. Ал, үшінші орынды 4-сынып оқушыларының ата-аналары жеңіп алды. Шаңғы жарысы барысында әйелдер арасында үшінші сынып ата-анасы Махаббат Қапышева, ерлер арасында екінші сынып оқушысының ата-анасы Нұрлан Ермағамбетов озық шықты. Әдеттегідей, жарыс қорытындысында жеңімпаздар грамоталармен марапатталды.
Гүлназым
САҒИТОВА
Суретте: жарыстан көрініс.
