Қала көшелерін қардан арылтуда

Қыс құрсауы – қалың қар. Жылдың төрт мезгілінде де тыным таппайтын "Тазарту – Арқалық" ЖШС   міндеттері күнделікті қоқыс шығарумен бірге қыс бойы қала көшелері мен жаяу жүргіншілер жолдарын уақытылы қардан тазартып, жол – көлік қозғалысының қалыпты сақталуына да  күш салады.

Мекеме  қазір қатты аязға қарамастан, апталап соққан ақ боран сықап толтырған қала көшелеріндегі қар құрсауын сейілтумен айналысуда. 

 – Төл міндетімізді тиянақты атқару біздің басты ұстанымымыз. Қар шығару жұмыстарына 5 техника және жұмыспен қамту бөлімі арқылы 25 адам жұмылдырылған. Қаңтар айында 7 мың куб. қар сыртқа шығарылды. Осылайша алдағы уақыттарда қаланың барлық көшелерін қардан тазартып, уақытша қиындықтардың алдын алатын боламыз, – дейді таяуда ғана "Ерен еңбегі еңбегі үшін медалін" төсіне таққан серіктестік басшысы Әлиакбар Қасымов.   

 Сонымен қатар, серпінді серіктестік қала іргесіндегі поселктердің де тазалығы мен жол қатынасын ұдайы назарда ұстап, көктемгі су тасқынының алдын алу шараларына да ерте бастан қам жасауда.    

 

Мұрат Жүнісұлы

Арқалық қаласы