Қысқы спартакиада қызықты өтті

by Qostanaı tańy · 20.01.2015

Ы. Алтынсарин атындағы Арқалық мемлекеттік педагогикалық институтының спорттық сауықтыру кешенінде дәстүрлі "Денсаулық – 2015" қысқы спартакиадасы өтті.

Спартакиаданың салтанатты ашылуында институт ректоры, география ғылымдарының докторы, профкссор С. Қуанышбаев құттықтау сөз сөйледі.

Сайысқа институт факультеттері мен ақпараттық кітапхана кешені және қауіпсіздік қызметінен 5 команда бел буды. Профессорлық оқыту құрамы мен олардың әріптестері спорттың: футбол, волейбол, баскетбол, шаңғы эстафетасы, дойбы, дартс, тоғызқұмалақ, үстел теннисі, көңілді мәре сынды 9 түрінен сынға түсті. Дене тәрбиесі және спорт кафедрасының меңгерушісі Г. Сапарғалиева бастаған төрешілер қауымы сайыстың жылдағыға қарағанда тартысты өткеніне тәнті болды.

Ең үздік спортшылар ретінде филология және педагогика кафедрасы танылды. Жүлделі екінші орын тарих және өнер факультетінің еншісне тиді. Үшінші орынға – ғылым және ақпарат факультеті, әкімшілік шаруашылық бөлімі тұрақтады.

Сайыстың барлық қатысушылары грамотпен, ақшалай сыйлықтармен марапатталды.