Үш күндік жол…
Алда – 400 шақырымдық жол. Күн райы +30 С градусты көрсетіп тұр. Бірақ аптап ыстық велошабандоздарға кедергі бола алмады.
Ахмет Байтұрсынұлының 150 жылдығына орай «Қостанай велосипед қауымдастығы» ҚБ ауқымды велошеру ұйымдастырды.
Қостанай-Әулиекөл-Шолақсай-Қостанай бағыты бойынша жалпы ұзындығы 400 шақырымға созылған велошеру бүгін облыс орталығындағы Ахмет Байтұрсынұлы ескерткіші жанынан бастау алды.
Спортшыларға Мәжіліс депутаты Самат Ақышев сәтсапар тілеп, іс-шараның маңызын айтып өтті.
«Біз жас ұрпаққа ұлы тұлғаның өмірін, еңбектерін, идеясын насихаттауға, ұмытпауға тиіспіз. Осындай іс-шаралар жұртты саламатты өмір салтын сақтауға шақырары сөзсіз», – деді С.Ақышев.
Қоғамдық даму басқармасының басшысы Марат Жұрқабаев ұйымдастырушыларға алғыс білдіріп, велошеруді ұлт ұстазына арналған ұлағатты бастамалар жыл бойы жалғасатынын тілге тиек етті.
Жолсапарға 20-дан астам кәсіби велошабандоз шықты. Оларға бастапқы жиырма шақырым бойы басқа да қала тұрғындары, жас спортшылар қолдау көрсетіп, бірге жүріп отырды. Қатысушылардың ең үлкені – 76 жастағы Қалқаман Жақып ағамыз. Ғалым әрі ардагер спортшы ресми жиында сөз сөйлеп, спортшыларға Ахаң туралы ақпарат берді.
«Ахмет Байтұрсынұлы – қазақ халқының рухани көсемі. Біздің мақсат – ұлы тұлғаның кім екенін жастарға жеткізу. Осы маршрутты аман-есен жүріп өтуге тілектеспін», – деді Қ.Жақып.
Велошеруге қатысушылардың арасында үшінші топтағы мүгедек Павел Бабенко да болды. Ол велоспортқа бала кезінен әуес, алайда кәсіби спортшы ретінде екі жыл тұрақты айналысып келеді.
«Сол аяғым протез. Бірақ соған қарамастан былтыр бірінші рет 200 шақырымға жүгіріп көрдім. Енді, міне, 400 шақырымға жетемін деп отырмын. Меніңше, бұл қозғалыс – белсенді өмір көрінісі ғана емес, аралас-құралас ортасы», – дейді ол.
Велошеру үш күнге жалғаспақ. Спортшылар Әулиекөлде бір түнеп, жұма күні Шолақсайға барады. Ол жерде өңірлік университеті оқытушылары жоғары сынып оқушыларына кәсіптік бағыт-бағдар беру және тұлғалық өсу жөнінен тренингтер өткізеді.
«Шолақсайда тағы бірнеше іс-шараға жоспарланған. Ұлттық асық ату және шахмат ойынынан жарыстар өткізіледі. Іс-шараның соңы велошеруге қатысушыларды марапаттауға және концертке жалғасады», – дейді іс-шараны ұйымдастырушы, «Қостанай велосипед қауымдастығы» ҚБ төрағасы Бауыржан Тебеев.
Оның айтуынша, тұлғалардың мерейтойына арналған велошерулер Қостанайда дәстүрге айналып барады. 2020 жылы Абай Құнанбайұлының 175, былтыр Ы.Алтынсариннің 180 жылдығына орай осындай бастамалар өткізілген еді.
Айта кетейік, аталған іс-шараға қоғамдық даму басқармасы, дене шынықтыру және спорт басқармасы, А.Байтұрсынұлы атындағы ҚӨУ, Қостанай облысының велоспорт федерациясы, Әулиекөл ауданының әкімдігі, «Шолақсай» ЖШС қолдау көрсетті.
Жолсапарға шыққан велошабандоздар 16 шілдеде Қостанайға оралады.
Суреттерді түсірген Бердіболат КӨРКЕМБАЕВ.
