Тігінші
Қараобалық Айман Күнтуова қолынан іс келетін шебер жан. Оның жасаған оюлы көрпесі, қоржын мен дорбаның түр-түрі, кестелеп тігілген әсем дүниелер дүйім жұрттың кәдесіне жарап отыр.
Тігінші Айман адал еңбегінің арқасында ауыл халқының ыстық ықыласына бөленген. Қараобадағы ісмерлердің арасында топ бастап тұр десек, әбестік болмас. Себебі, ауылдықтар тігіншінің қолынан шыққан дүниені әп-сәтте алып кетеді.
– Іс тігуге жасымнан жақын едім. Оның қыр-сырын кезінде енем үйреткен. Қазір үлкендерден көріп, үйренгенім бойынша жұмыс істеп жатырмын. Тапсырыс берушілердің қатары да артуда. Үлгермей жатсам немерелерім көмектеседі, – деді Айман Күнтуова.
Кейіпкеріміз тігіншілікпен нәпақасын тауып, отбасының ұйытқысы болып отыр. Құдай қосқан қосағы Байтемірмен бірге ұлын ұяға, қызын қияға қондырып, немерелерін тәрбиелеуде.
Руслан ӘЛКЕЙ.
Сарыкөл ауданы.
СУРЕТТЕ: Айман Күнтуова.
