Жасай бер жаса, ардагер!
Еліміздегі ардагерлерге Елбасының атынан құттықтаулар мен сыйлықтар табысталып жатыр. Осынау өнегелі іс-шарадан Әулиекөл ауданының азаматтары да қалыс қалған жоқ. Аталмыш ауданның әкімі Амантай Балғарин ардагерлердің үйіне арнайы барып, мемлекет басшысының құттықтау хатын тапсырған болатын.
Әулиекөл ауданында 6 мыңнан астам зейнеткер бар. Соның ішінде алты жүзі тыл еңбеккері, он бірі ҰОС-ның қатысушысы. Осы он бір ардагерді аудан әкімі бастаған топ Жаңа жыл мерекесімен құттықтап, ардагерлердің хал-жағдайын білді. Алдымен Алдаберген Қаскиннің үйіне барған едік. Сексен сегіз жастағы атамыз алдымыздан шықты. Сірә, аудан басшыларының құттықтауға келерін естіген соң үйде шыдап отыра алмаған шығар. Ақсақал жиналған азаматтарға ақ батасын беріп, Елбасының саясаты оң екенін айтты. Тәуелсіз еліміз түскен соқпақ Мәңгілік Елге бастайтынын баяндады.
-Ардагерлерді назардан тыс қалдырғанымыз жоқ. Әрқашан жағдайларын біліп отырамыз. Мерекелік іс-шаралардан қалдырған емеспіз. Біз үлкенді сыйлаған елдің ұрпағымыз. Үлкенге құрмет білдіру қанымызда бар қасиет. Ақсақалдардың ақ батасын алып жүргенге не жетсін?!,-деді Әулиекөл ауданының әкімі Амантай Балғарин.
Келесі кезекте Владимир Приставский және Василий Чалый сияқты қос ардагердің үйіне бардық. Ақсақалдар аудан әкімі апарған сый-сияпатты қуана қарсы алып жатты.
– Ауданымыздағы ардагерлердің дендері сау, балалары аман, тыныштықта өмір сүріп жатыр. Бәрінің баспаналары бар. Медициналық көмек дер кезінде көрсетіледі. Олардың көлікпен жүріп-тұруына, отын-суы мен телефон төлемдеріне аудан бюджетінен жәрдемақылар беріледі,-деді аудандық ардагерлер ұйымының төрағасы Әкімбек Қабденұлы
Қымбат Досжанова
