Әкім католиктерді құттықтады

Кеше облыс әкімі Н.Садуақасов қаламыздағы “Успения Богородицы” рим-католик приходында өткен  рождестволық діни шараға қатысып, дін өкілдерін Рождествомен құттықтады.

Діни дәстүр бойынша, Рождество қарсаңында, яғни желтоқсанның 24-нен 25-не қараған түні католиктер “сочельник” мейрамын атап өтеді. Бұл күні олар тағамға тек бидай немесе арпа дәнінен жасалған арнайы дәмді пайдаланып, дастархан жаяды. Қаламыздағы “Успения Богородицы” приходына кешкі сегізден жиналған католиктер де арнайы жайылған дастархан басында діни әндер айтып, өлең оқып, бір-біріне рождестволық тілектерін жаудырды. Құдайға құлшылық етіп, дұға оқыды. Діни шараға қатысқан өңір басшысы да сочельникке жиналған католиктерге зор денсаулық, отбасыларына амандық, елімізге тыныштық тіледі. Сондай-ақ, әкім еліміздегі достық пен келісімнің, ынтымақ пен берекенің қазақстандықтар үшін ең басты байлық екендігін де ерекше айтып өтті.

-Біздің Қазақстан – көп ұлтты әрі көп дінді мемлекет. Елімізде құрылған Ассамблея аясына шоғырланған әр ұлттың өкілдері бүгінде бейбітшілік пен келісім де өмір сүріп жатыр. Бірлігі мен татулығы жарасқан елдің тірлігі де берекелі болмақ.  Елбасымыз ұстанған басты саясаттың бірі де осы татулық пен келісім. Бүгінгі діни шараға жиналған сіздерді Рождествомен құттықтап, дендеріңізге саулық, отбастарыңызға амандық тілеймін, – деді облыс әкімі Н.Садуақасов.

 

 

Қарлығаш Оспанова

Суретті түсірген Айбек Жүзбай