Банк қызметкерлері марапатталды

Қазақ тілінің мемлекеттік мәртебеге ие болғанына биыл 25 жыл толды. Осынау маңызды датаға орай Қостанай облыстық тілдерді дамыту басқармасы әр салада «Мемлекеттік тілді қастерлейміз!» байқауын жариялады. Басты мақсаты-мемлекеттік тілдің қолданыс аясын кеңейту.

Аталмыш байқау екінші деңгейлі банктердің арасында да өткен болатын. Оған қаладағы «Қазақстанның тұрғын үй құрылыс жинақ банкі» АҚ, «Цеснабанк» АҚ, «БанкЦентрКредит» АҚ, «Еуразиялық Банкі» АҚ №7 филиалы, «Қазақстан Халық Банкі» АҚ, «Нұрбанк» АҚ қатысты. Нәтижесінде «БанкЦентрКредит» АҚ Қостанай филиалы үздік деп танылып, арнайы дипломға ие болды. Өзге қатысушыларға алғыс хаттар табысталды. 

– Байқауды өткізу барысында әр банктің мемлекеттік тілде іс қағаздарды жүргізуі және көрнекі ақпараттардың дұрыс жазылуын тексердік. Нәтижесі жаман емес. Банк қызметкерлері қазақша сауатты жауап берді,-деді облыстық тілдерді дамыту басқармасының басшысы Ж.Үмбетов.

Халыққа қызмет көрсету саласында банктердің атқаратын ролі орасан зор. Себебі ол жерге адамдар көп барады. Клиенттің бірі қазақша сұрақ қойса қызметкердің сөзден тосылғаны өзіне сын. Себебі қазақ тілі мемлекеттік тіл емес пе?! Бұл ретте ҚР Ұлттық Банкі Қостанай филиалын мақтанышпен айтуға болатындай. Себебі онда қызметкерлерді мемлекеттік тілге оқыту жолға қойылған. Сондай-ақ банк ішінде «Тіл құдірет» клубы бар. Сол клубтың мүшелері әр тоқсанның он сегізінде жиналып қазақтың салт дәстүрі, әдет ғұрпы туралы ақпараттармен бөліседі. Әр айдың соңғы сәрсенбісінде қазақ тілі күні өтеді. Оған әр бөлім алма кезек дайындалады.

-Қазақ тілінің мемлекеттік қызметте кеңінен қолданылуы үшін көптеген жұмыстар жасалуда. Игі бастамаларды әрі қарай дамытып әкету біздің қолымызда. Ата-бабамыз тілді, салт-дәстүрді қадірлеп, қастерлеп аманаттап қалдырып кетті. Сол аманатқа дақ түсірмей, ата дәстүрдің қаймағын бұзбай кейінгі ұрпаққа жеткізу біздің міндетіміз,-деді ҚР-ның Ұлттық Банкі Қостанай филиалының директоры Мираш Жұмашұлы.

Қымбат Досжанова

Суретті түсірген Айбек Жүзбай