Қор өз жұмысын қорытындылады

“Мархабат” қоғамдық қоры әлеуметтік жобалар бойынша атқарған жұмыстарын қорытындылады.

Қор төрайымы Биға Бисетаеваның айтуынша, облыстық денсаулық сақтау басқармасы мен облыстық салауатты өмір салтын қалыптастыру проблемалары орталығы мамандарымен бірігіп жұмыс жасаудың нәтижесінде біраз шаралар атқарылған көрінеді. Ағымдағы жылдың қыркүйек айынан бері қор мамандары арнайы жоба аясында Қостанай қаласы мен Сарыкөл, Федоров, Қостанай аудандарында болып, тұрғындар арасында саламатты өмір салтын қалыптастыру мен профилактикалық бағытта  келелі әңгіме қозғап, тегін кеңестер беріп, “Саламатты қала”, “Ұзақ өмір сүру өз қолыңда!” деген ұранмен акциялар өткізді. Қоғамдық қор өткізген іс-шараларға барлығы екі мыңнан астам жұмылдырылған.

-Біздің қордың басты мақсаты – қант диабетінің алдын алу, аурудың етек жайып кетуіне тосқауыл қою үшін тұрғындар арасындағы саламатты өмір салтын қалыптастыру бағытында түрлі жұмыстарды атқару. Ағымдағы жылы да қант диабеті, оның алдын алу, жалпы денсаулықты күту, ұзақ өмір сүрудің сыры мен саламатты өмір салтын ұстануға бағытталған шараларды да қамтыдық. Жыл басынан бері осы мақсатта 12 семинар мен 5 дөңгелек үстел өткізіп, жергілікті бұқаралық ақпарат құралдарында онға жуық мақалалар мен репортаждар жарық көрді. Бұл бағыттағы жұмыстар келер жылы да жалғасын табатын болады, – дейді Б.Бисетаева.

 

 

Қарлығаш Оспанова