Ел дамуының айнасы

Елбасы Н.Ә.Назарбаевтың Қазақстан халқына арнаған дәстүрлі Жолдауы биыл жылдағыдан ерекше ерте жарияланды. Маңызды құжатты мұқият тыңдадық. Бәрі ұғынықты, қысқа әрі нұсқа болды. Әрбір тақырыптың нақты тапсырмалары бар. Елбасы ұлттық қорға жиналған қаражаттың дағдарыс уақытында іске қосылатындығын айтты. Ол мемлекетіміздің экономикалық өркендеуіне тың серпін әкелмек. Елімізде 200 мыңнан астам адамға жаңа жұмыс орны ашылады.

"Ел дамуының ең басты көрсеткіші жол мәселесі. Әрбір дамыған мемлекет осындай жағдайды бастан өткерген. Біз де осы жолмен өтеміз", – деді Нұрсұлтан Әбішұлы. Осыған сай алдағы уақытта "Астана", "Атырау", "Ақтау" бағыттарына жол салынады. Ел мен елді шендестіріп, тың жерге тіршілік әкелетін жол құрылысының қарқын алатынын естіп, қуанып жатырмыз. Дайындық жұмыстарын бастап та кеттік. Жол салуда тәжірибеміз бар. Тас үгітетін, асфальт шығаратын зауыттарымыз, күш-көлік техникамыз жеткілікті.   

 Жолдауда айтылған қолжетімді баспаналардың тұрғызылатындығы әрбір жас отбасының ертеңгі күнге деген сенімдерін нығайтары сөзсіз. Мектеп, балабақша мұқтаждықтары да таяу жылдарда түбегейлі шешілмек. Өнеркәсіп салалары өнімді өздерінде өндіруге күш салады. Моноқала мәселесі де күн тәртібінен түспейді.

 Қазіргі таңда қаладан 60 пәтерлі үйдің құрылысын аяқтау шегіне жеткізіп, алдағы Тәуелсіздік күнінде пайдалануға бергелі отырмыз.

Абай Мұқанов,

қалалық мәслихаттың депутаты, "НұрОтан" партиясының облыстық, қалалық саяси кеңесінің мүшесі, "Алюминқұрылыс" ЖШС бас директоры.

 Арқалық қаласы.