“Нұрлы жол” – жаңа жетістіктерге жеткізеді”
Таяуда Қ.Әбенов атындағы Мәдениет үйінде Елбасымыз – Ұлт Көшбасшысы Н.Ә.Назарбаевтың Қазақстан халқына арнаған "Нұрлы жол – болашаққа бастар жол" атты Жолдауы талқыланды.
Оған Аманкелді селосының жұртшылығы, мекеме және кәсіпорын ұжымдары, үкіметтік емес ұйымдар, аудандық мәслихат депутаттары, аудан ардагерлері, кәсіпкерлер мен жас мамандар, мектептердің жоғары сынып оқушылары және БАҚ өкілдері қатысты.
Рәсімді аудан әкімі Ж.Қ.Таукенов ашып, жүргізіп отырды.
Аудан әкімі Ж.Қ.Таукенов "Елбасы – Ұлт Көшбасшысы Н.Ә.Назарбаевтың "Нұрлы жол – болашаққа бастар жол" атты Жолдауынан туындайтын міндеттер" деген тақырыпта баяндама жасады.
Баяндама бойынша Аманкелді селосының тұрғыны, зейнеткер С.Сайділдин, "Нұр Отан" партиясы аудандық филиалы төрағасының бірінші орынбасары А.Қ.Ташимов, кәсіпкер Ж.Ш.Давлетова, Ы.Алтынсарин атындағы орта мектеп директоры Ғ.А.Әлмағанбетов, "Жұпар" балабақшасының меңгерушісі Г.Баженовалар жарыссөзге шықты.
Талқылауға қатысқан аудан жұртшылығы Елбасымыздың жаңа Жолдауының маңызын зор қанағаттанғандық сезіммен атап көрсетті. Осы Жолдаудан туындайтын міндеттерді орындауға бір кісідей ұйымшылдықпен жұмылатындықтарын білдірді. Олар Жолдаудың тарихи маңызына кеңінен тоқтала келе, Қазақстан халқының экономикалық дамуын одан әрі қамтамасыз етуге оның тигізетін ықпалының зор екенін мәлімдеді.
– Құрметті аманкелділіктер! Мен Елбасымыздың бұл Жолдауын теледидардан көріп, тыңдап қана қоймай, баспасөзден екі қайтара оқып шықтым. Бұл Жолдау – Елбасымыздың бұған дейінгі 18 Жолдауынан да өзгеше. Мұнда еліміздің жаңа экономикалық саясаты белгіленген. Менің ойымша "Нұрлы жол" – халқымызды нұрлы болашаққа жеткізеді деп білемін. Жолдауды оқи отырып, Қазақстанның экономикалық қуатының қандай деңгейге көтерілгенін қапысыз ұғуға болады. Өзге елдер дағдарыстан дірілдеп жатқанда, біздің еліміз Ұлттық Қор арқылы көп ұлтты Қазақстан халқының әлеуметтік жағдайын жақсартуға нақты мол қаржы бөліп отыр. Бұған қалай қуанбассың! – деді Жолдауды талқылауға арналған жиналысқа қатысқан соғыс және еңбек ардагері Ертай Мұқанұлы ақсақал.
Хамитбек
МҰСАБАЕВ
Аманкелді ауданы.
