Мереке күнгі марапат (фоторепортаж)

by Qostanaı tańy · 07.03.2023

Халықаралық Әйелдер күні мейрамын атап өту өңірімізде кең үрдіс алған. Бүгін Жастар сарайында облыс әкімі Құмар Ақсақалов аймақтың түкпір-түкпірінен шақырылған ел аналарын, аяулы әжелерді, қоғамда белсенділік танытып жүрген саясаткер нәзік жандыларды, көп балалы келіншектерді, білім, ғылым, медицина, бұқаралық, мәдени-спорттық салаларда жетістіктерге жеткен әйелдер қауымын құттықтады.

Тобыл-Торғай тарихында есімдері алтын әріптермен жазылған даңқты аналарымыздың бары қуантады. Басқаны айтпағанда, «Қостанай» атауының өзін Тана, Танай есімдерімен тікелей байланыстырамыз. Кешегі Уәли сұлтанның жары, ұлы ғалым Шоқанды тәрбиелеген Айғаным ханшаны, ұлтымыздан шыққан тұңғыш кәсіби журналист Нәзипа Құлжанованы, әйгілі механизатор, Социалистік Еңбек Ері Кәмшат Дөненбаеваны, бүгінгі ортамызда жүрген мақтанышымыз, Халық ақыны Әсия Беркенованы қазақ әйелдерінің эталондары десек, артық айтқандық емес.

Рас, қазір әйел затына қатысты «нәзік жанды» ұғымының мағынасы ауысып бара жатыр. Мемлекетімізде қанша қыз-келіншектер атқарушы билік, заң шығарушы, құзырлы органдармен қатар, бизнес саласын басқарып жүр. Әйелдердің бастамасымен көптеген үкіметтік емес ұйымдар, қайырымдылық қорлары жұмыс істейді.

– Заманымыздың заңғар жазушысы Мұхтар Әуезов «Ана бір қолымен бесікті тербетсе, бір қолымен әлемді тербетеді» деп әйел затына қатысты барлық теңеудібір ауыз сөзге сыйдырған екен. Халқымыз қашаннан қыз баланы қадірлеп, ел аналарына төрден орын берген. Бүгін де сол игі дәстүр үзілмей, қоғамда нәзік жандарға ерекше назар аударылып келеді. Мемлекет тарапынан көп балалы отбасыларға қолдау көрсетуге, ана мен бала денсаулығын қорғауға бағытталған жұмыстардың ауқымы кең. Осының арқасында елдегі демографиялық жағдай түзеліп, қазіргі таңда халқымыздың саны 20 миллионға жақындады. Бұл ретте біздің өңіріміздің де әйелдерін айрықша атап өтуге болады. Осы жылдар аралығында Мемлекет басшысының жарлығымен облысымызда 6 мыңға жуық көп балалы ана «Алтын алқа» және «Күміс алқа» төсбелгілерімен марапатталды. Бүгін олардың қатары тағы да қырық адаммен толығып отыр, – деді аймақ басшысы Құмар Ақсақалов құттықтау сөзінде.