Үздіктердің үздігі

Облыстық жастар ресурстық орталығы «Jasliga»  жобасы аясында №29 мектепте суперкубок ойындарын өткізді. Оған 2022 жылы жеңімпаз болып, үздік шыққан 6 команда қатысты. Олар баскетбол, шағын футбол, волейбол сынды спорт түрлерінен сынға түсіп, өзара мықтылар анықталды.

– Жобаның берер пайдасы көп. Басты мақсат – жастар арасындағы спортты дамыту, саламатты өмір салтын ұстанатын жас буынды қалыптастыру. Өткізіліп жатқан жарыс былтырғы жеңімпаздар арасынан үздіктерін анықтау үшін ұйымдастырылды, – дейді облыстық Жастар ресурстық орталығының жастар бастамалары секторының басшысы Гүлбарам  Жұмағалиқызы.

Студенттер, жас мамандар және жұмыссыз жүрген жастар да ойын алаңынан табылды. Волейбол ойнында «Намыс» – «KYZBEL», шағын футболдан «Астықжан» – «Саламат»,  баскетболдан «Шанс» – «PULSE» сынды командалар бақ сынады.

– Осы жылға еншіленген жоспарымыз өте көп. Наурыз айында мемлекеттік тапсырыс аясындағы жұмыс жоспары белгілі болмақ, – дейді Г.Жұмағалиқызы.

Жарысқа жиналған жастардың көңіл-күйі көтеріңкі. Тіпті арнайы ойын үшін уақыт бөліп, алыстан ат терлетіп келгендер де бар. Сондай жастың бірі – Саят Мақашұлы. Ол Ақмола облысы Есіл ауданынан келген.

– Ойын өте қызықты әрі тартысты өтті. Себебі жастардың басын қосуға негізделген жобаның берер пайдасы көл-көсір. Былтырғы ойында бірінші орынды иеленген едік. Командамызда сақадай сайланған сайыпқырандар бар. Бүгінгі жарыс біз үшін ерекше болды. Жаңа орта, жаңа дос табуға мол мүмкіндіктер сыйлайды, – дейді «KYZBEL» командасының мүшесі Саят.

Тартысқа толы жарыста «Намыс», «Шанс», «Саламат» командалары суперкубок иегері атанды. Қалған командаларға қатысқаны үшін естелік мүшіншелер мен мадақтамалар табыс етілді.