“Қайрақ” бекетінде көлік кептелісі бар ма?

Оған "Қостанай таңы" газетінің тілшілері көз жеткізіп қайтты. Бұл мәселеге қатысты Қостанай облысы бойынша Мемлекеттік кірістер департаментінің өкілі бекет басына арнайы барып, мәлімдеме жасады.

– Мемлекеттік кірістер департаменті жүк көліктеріне деректі мониторинг жасайды. Яғни, тауар құжаттарын сканерден өткізіп отырады. Ол, бар болғаны, бір жүк көлігі үшін 5-8 минут уақыт алады. Ал жеңіл көліктердің бізге қатысы жоқ. Бекет басында экспорттық бақылау қызметкерлерінің алдында кезек жоқ, – деді Қостанай облысы бойынша Мемлекеттік кірістер департаменті басшысының орынбасары Дәмір Насыров.

Ресей Федерациясы аумағында инспекциялық-тексеру кешені орналасқан. Құрылғының көмегімен әр жүк көлігін тексеруден өткізеді. Сол уақыт аралығында бейтарап жолақ лық толады. Аймақ босамайынша қарсы беттен жүк көліктері өте алмайды. Салдарынан 2-3 сағат кезектерін күтуге тура келеді. Жүк көлігінің иелері ұзын-сонар кептелістің жоғын айтты. Бұрындары 15-20 сағаттап кезек күткен күндері де болған.

– Өзбекстаннан келе жатырмыз. Тексеріс жұмыстарының қалай жүргізілетінін білеміз. Әр жүк көлігін қарауға уақыт керек, сол себепті шыдамдылық танытамыз. Жүк көліктерінің санына байланысты. Кезегімізді тәуліктеп күткен сәттер де болды. Кейде күтуге тура келеді, енді бірде тез-ақ өте шығамыз, – дейді фура жүк көлігінің жүргізушісі, Өзбекстан азаматы Сардор Наматов.

Біз барғанда бекет басында Қазақстаннан Ресей Федерациясына өту үшін кезекте 95 жүк көлігі тұрды. Уақытқа салғанда 10-20 минут аралығында 4-5 көліктен өтіп жатты. Бұл жұмыстың штаттық режимде жүріп жатқанын білдіреді. Ал газельдер мен жеңіл көліктер еш кідірместен арлы-бері қатынап жатыр. Қосымша сауалдар бойынша шекара қызметінің қызметшілеріне жақындаған едік, олар қандайда бір сұраққа жауап беруден бас тартты.