Құмар Ақсақалов: “Сапасыз құрылысқа сырттан келген компаниялар кінәлі”
Былтыр тұрғын үй құрылысы саласында оң нәтижеге қол жеткен. Деректерге жүгінсек, 449 мың шаршы метр тұрғын үй салынып, ұзын саны 3 892 пәтер пайдалануға берілді. Биыл осы көрсеткішті 11 пайызға арттыру көзделіп отыр. Алдағы үш жылда 45 мың адамды тұрғын үймен қамту жоспарда бар. Бірақ бұл облыстың барлық өңірінің үйлесімді жұмысына тікелей байланысты.
«Қостанай қаласы, Денисов, Қарабалық, Қарасу аудандарында құрылыс-монтаждау жұмыстары оң динамикаға ие. Керісінше, Рудный, Лисаков қалалары және Амангелді, Қамысты, Сарыкөл аудандары кенжелеп тұр. Тіпті, Арқалық қаласы мен Науырзым ауданындағы көрсеткіш 50 пайыздан төмен», – деп баяндады облыстық Құрылыс, сәулет және қала құрылысы басқармасының басшысы Берік Таңжарықов.
Оның айтуынша, тұрғын үйлер салу мерзімдері бірнеше рет ауыстырылғанын да айтты. Бұл – тек құрылыс ұйымдарының ғана емес, өңірлер әкімдіктерінің де сапасыз жұмысының салдары. Биыл өткен жылдардан шегеріліп келе жатқан 49 баспананың құрылысын аяқтауға күш салу міндеті тұр. Мұның сыртында, бөлінген қаржының уақытылы игерілмеуі де мәселеге айналып отыр.
«Тұрғын үй құрылысы, инженерлік инфрақұрылымға былтыр 5,4 млрд теңге бөлінген. Осы соманың 169,4 млн теңгесі игерілмеді. Қостанайдағы 4 нысан, Жітіқарадағы 1 нысан құрылысы мерзімінен кешігіп, атқарылған жұмыстар акті дайындалмауы кесірінен осындай түйткіл туындаған», – дейді басқарма басшысы.
Қазір Қостанайдағы Қонай, Береке, Қостанай ауданындағы Астана, Бәйтерек шағын аудандарында инженерлік желілерді жүргізу жалғасып жатыр. Басқа өңірлердегі толымды істер де атап өтілді.
«Барлық өңір бірдей алға қойылған міндеттерді орындаған жоқ. Осы бағытта Арқалық, Рудный, Лисаков қалалары мен Науырзым, Амангелді, Қамысты, Сарыкөл аудандары кері көрсеткішке ие. Қостанай, Рудный қалалары да әлеуметтік тұрғын үй салу жөнінен нашар екенін айтқым келеді. Қостанайда аяқталмаған 43 үйдің біреуі ғана – Юбилейный шағын ауданындағы №49 үй пайдалануға берілді. Әуежай, Қонай шағын аудандарындағы үйлерді де аяқтау өзекті болып тұр. Тұрғындар маған да келді, БАҚ беттерінен де шағымдарын көріп отырмын. Бұл мәселені қалай, қашан шешеміз?», – деді облыс әкімі.
Бұл сауалға Қостанай қаласының әкімі жауап беріп, қалған 42 үйдің құрылысын аяқтауға 23,1 млрд теңге бөлінгенін, биыл 32 тұрғын үй пайдалануға берілетінін айтты. Ол қазір құрылыс қарқыны баяулау жүріп жатқанын да мойындап отыр. Оны жеделдету үшін барлық мүмкіндік жасалатынын алға тартты. Жалпы, құрылыс бағытындағы басқа да ауқымды жұмыстар, жоспарлар туралы есеп берді. Облыс әкімі құрылыс мердігерлерін де тілге тартып, жұмыс барысын сұрады. Олардың ішінде сырттан келген компаниялардан жауап алды.
«Нақты детальді жоспар жасаңыздар. Апта сайын жұмыс сапасын тексеріңіздер. Техникалық, кәсіби бақылау қажет. Не істелді, қай тұсында кемшілік бар – соны анықтап отыру керек. Егер қандай да бір кемшіліктер, кешігулер болса,айыппұлға тартыңыздар. Әрбір қадамдарын қадағалау керек. Көп мердігер «бәрін істейміз, күшіміз жетеді, мүмкіндігіміз бар» деп алады да, кейін уақыт керек деп сылтау айтып отырады. Сосын келіп халық тарапынан наразылық туындайды», – деді Қ.Ақсақалов.
Сондай-ақ, ол сырттан келген мердігерлерге де сын айтты. «Сақалды» құрылыстардың көбеюіне солардың немқұрайдылау жұмысы себепші екенін төтесінен қойды.
«Мен жаңа басқа өңірден келген компания басшыларын орындарынан бекер тұрғызған жоқпын. Қарап отырсақ, проблемалы нысандардың көбіне солар мердігер болып отыр. Олар портфельмен келіп, барлық жұмыс күшін, техниканы осы жақтан жалға алады. Бұл жауапкершіліктің төмендігін көрсетеді. Конкурстарды бір қарап шықтым, өкінішке қарай, басқа қалалардың компаниялары өте көп екен. Жергілікті компаниялардың белсенділігі неге төмен? Неге олар осылар секілді жұмыс істемейді? Жерлестерді белсенді қатысуға шақырамын. Сондай-ақ, сырттан келген мердігерлер бұдан былай қатаң бақылау болады», – деп түйіндеді облыс әкімі.
